DILI, 18 dezembru 2020 (TATOLI)—Relasiona ho selebrasaun loron boot natal 2020 no tinan foun 2021, Ministériu Saúde (MS) apela ba populasaun atu mantein distánsia sosiál no fiziku hodi prevene transmisaun lokál ba pandemia globál COVID-19 iha Timor-Leste.
“Atu informa ba públiku no komunidade tomak relasiona ho selebrasaun loron boot natal 2020 no tinan foun 2021 husu nafatin atu bele kumpre medida sanitária ba situasaun ida ne’ebé mak agora mundu enfrenta hodi bele kontrola COVID-19,’’ Koordenadór COVID-19, Nilton da Silva, ba jornalista sira, iha Palasiu Sinzas Caicoli, sesta ne’e.
Notísia Relevante:MS rekoiñese involvimentu Parseiru Internasionál ba prevene COVID-19
Atu livre husi moras globál coronavirus ne’e, nia sujere atu ema hotu-hotu halo protensaun liuhosi prátika fase-liman beibeik ho sabaun, taka ibun bainhira mear, labele ka’er matan no ibun, uza máskara no seluk tan.
”Evita ba fatin públiku no limita tempu iha espasu ne’ebé taka metin bainhira distánsia fiziku la posivel obrigatóriu ita uza máskara,’’ nia hateten.
Mantein distánsia metru ida ka liu husi ema seluk, hamoos beibeik objetu no fatin sira ne’ebé ita ka’er beibeik izola an husi ema bainhira sente moras no buka tratamentu bainhira presiza.
Notísia Relevante:Prevene COVID,SSC Kontinua Implementa Triajén
Jornalista :Felicidade Ximenes
Editór :Agapito dos Santos
