Reprezentante família saudozu Tae Siri, Gaspar Afonso, hala’o konferénsia imprensa iha kampu Benfica, Dili. Imajen TATOLI/Evaristo Soares Martins.

DILI, 18 dezembru 2020 (TATOLI)—Monumentu saudozu 20 Komandante Setór Fronteira Súl), João Bosco “Tae Siri”, sei inaugura iha loron 28 ezembru 2020 iha Aldeia Oelaca, Suku Deudet, Posto Administrativu Lolotoe, Munisípiu Bobonaro.

“Prezidente Parlamentu Nasionál Aniceto Guterres mak sei inaugura monumentu ne’e iha loron 28 dezembru semana oin no sei partisipa mós Ministru ba Asuntu Kombatente no Libertasaun Nasional Júlio Sarmento “Mali,” Reprezentante família saudozu Tae Siri, Gaspar Afonsso, informa liuhosi konferénsia imprensa iha kampu Benfica, Dili, sesta ne’e.

Reprezentante família saudozu Tae Siri ne’e fó-sai katak monumentu ne’e harii iha Munisípiu Bobonaro, Postu Administrativu Lolotoe, Suku Deudet, ne’ebé konstrui iha loron 07 setembru de 2020 no finaliza iha loron 26 setembru 2020.

Reprezenetante família ne’e dehan, Sekretáriu Jerál FRETILIN, Mari Alkatiri, Xefe Estadu Maiór F-FDTL, Majór Jenerá Lere Anan Timur no Fausto Freitas da Silva “Liurai Tasi” sei sai oradór ba semináriu ida-ne’ebé organiza hosi família.

João Bosco “Tae Siri” moris iha Lolotoe, Bobornaro iha loron 01/06/1952 no mate iha Maliana iha loron 27 maiu 1980.

Saudozu 20 Komandante Setor Fronteira Sul, João Bosco nian ne’ebe simu orientasaun hosi Comite Central da FRETILIN (CCF) ho pozisaun Komandante da Ekipa iha loron 04 setembru 1975 ho membru na’in-63 arma sai hosi Dili liuhosi Munisípiu Ermera kontinua ba Munisípiu Bobonaro hafoin liu mai iha fronteira Lolotoe.

Iha fulan-juñu 1976 Saudozu hola pozisaun 20 Komandante Zona Lolotoe, hafoin 10 Komandante Zona Lolotoe, Joel da Costa Alves mate bainhira hetan tiru hosi militár Indonézia iha  loron 10 maiu 1978.

Hafoin Saudozu João Bosco asume fali pozisaun 10 Komandante Zona Lolotoe, iha fulan juñu 1978 saudozu hetan fiar hosi Comite Central da FRETILIN (CCF) hodi asume kargu 20 Komandante setor Fronteira Súl.

Nune’e kontinuasaun prosesu luta frente a frente lubuk ida, mak Saudozu monu iha inimigu nia embuskada no inimigu tiru kanek hosi parte kabun kidun, iha Suku Saburai, Postu Administrativu Maliana hafoin saudozu lakon nia vida iha hospital referál Maliana iha loron 27 maiu 1980.

Monumente refere inisia hosi família boot saudozu João Bosco (Kolaboradór/20 Komandante Fronteira Sul) nian ne’ebé gasta osan rihun $3 no apoia hosi Ministériu ba Asuntu Kombatente no Libertasaun Nasional osan rihun $4.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here