MKAE-TradeInvest lansa sistema informasaun internál, iha sala reuniaun TradeInvest, Colmera, sesta (18/12). Imajen/Mídia MKAE

DILI, 18 dezembru 2020 (TATOLI)—Governu liuhosi Ministériu Koordenadór Asuntu Ekonómiku (MKAE) hamutuk ho Ajénsia Promosaun Investimentu no Esportasaun (TradeInvest) lansa Investment Tracking System (ITS) ka Sistema Rastreamentu Investimentu, ne’ebé permite investidór asesu informasaun kona-ba área potensiál no oportunidade investimentu.

“Lansamentu sistema ne’e importante tebes ba investidór sira tanba bele tulun asesu informasaun kona-ba área potensiál saida maka sira atu investe iha Timor-Leste,” Ministru Koordenadór Asuntu Ekonómiku, Joaquim Amaral, informa sesta ne’e, hafoin seremónia lansamentu sistema, iha sala reuniaun TradeInvest, Colmera.

Sistema informasaun internu ho tipu Customer Relationship Management (CRM) ka Jestaun Relasionamentu Kliente ne’e, dezeña no dezenvolve husi funsionáriu TradeInvest, ho suporta espesialista husi International Finance Corporation (IFC).

Ministru Joaquim konsidera sistema ne’e nu’udar parte ida husi reforma ne’ebé VIII Governu Konstitusionál introdús ona, hanesan sistema ASYCUDA World.

“Saida maka TradeInvest halo liuhosi prosesu ida, tanba iha faze rekuperasaun ekonómika, Governu tenta hadi’a ambiente negósiu atubele atrai liután investidór sira atu hahú filafali atividade negósiu no haree potensialidade saida maka Timor-Leste iha,” nia subliña.

Governate nota, sistema informasaun ne’e bele hafasil liután servisu Ajénsia Promosaun Timor-Leste ne’e ba atensidade públiku iha negósiu.

“Governu liuhosi TradeInvest halo promomosaun no akompañamentu ba investimentu sira no tenta nafatin husi tempu ba tempu  mellora atendimentu liuhosi hadi’a sistema iha área negósiu,” nia akresenta.

Governante ne’e dehan, presiza moderniza plataforma negósiu.

“Sistema ne’e fasilita informasaun ne’ebé investidór sira hakarak, ne’ebé tempu ba tempu sei lori informasaun besik liu povu,” Ministru hatutan.

Iha seremónia ne’e, ekipa responsável ba sistema aprezenta prosesu no interasaun entre TradeInvest no investidór estranjeiru inklui dadus ne’ebé kolleta ba Governu.

Rekursu prinsipál sistema ne’e maka interasaun TradeInvest no investidór estranjeiru, kontaktu jerensiamentu, sertifikadu investimentu no detalla deklarasaun benefísiu, dadus kona-ba dezempeñu investimentu hanesan kapitál investimentu, empregu foun, kualifikasaun mão de obra, produsaun no impostu iha Timor-Leste.

Nune’e mós, sistema informasaun ne’e hatudu dadus kona-ba klima investimentu iha Timor-Leste ho baze esperiénsia investidór relasiona ho  tributasaun, mão de obra, vistu, servisu públiku, terrenu, transporte, alfándega no seluk tan.

Sistema ho baze CRM ne’e aprezenta mós dadus minerasaun oin-oin, husi país orijen, setór no status investimentu.

Iha biban ne’e, MKAE no TradeInvest atribui deklarasaun benefísiu ba Diretór Funan Santalun, Unip. Lda, Agustinho Noronha no Diretór Leste Food & Beverage, S. A, Pedro Morante Ardite, atu fasilita investimentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here