Ministru Ensinu Superiór, Siénsia no Kultura Longuinhos dos Santos. Imajen/Egas Cristovão

DILI, 18 dezembru 2020 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, hateten Governu trasa ona programa prioridade haat atu apoiu Instituisaun Ensinu Superiór Privadu (IESP) iha Timor-Leste.

Ministru Longuinhos dos Santos, hato’o asuntu ne’e bainhira halo sorumutu ho Konsellu Reitores husi IESP sira ne’ebé hala’o iha Otél Novo Turizmo, sesta ne’e.

Notísia Relevante:Governu Planea Oferese Kreditu ba IESP-TL iha Futuru

Programa prioridade haat ne’e maka apoiu liña kreditu ba IESP sira ho juru  ki’ik, bolsa estudu ba dosente sira, bolsa estudu ba rejime hakbi’it, no formasaun lian Português ba dosente sira.

“Ita sei fó ba IESP sira apoiu liña kreditu ho taxa juru ne’ebé  ki’ik  nu’udar meius ida atu tulun no ajuda hasa’e no garante kualidade iha sira ninia dezenvolvimento akadémiku, sei fo mós bolsa estudu para atu hasa’e kualidade no koñesimentu dosente nian liuhusi hasa’e sira ninia grau husi lisensiatura (S1) ba mestradu (S2) inklui dotoramentu (S3),” nia dehan ba jornalista sira iha otel Novo Turizmu Lecidere, sesta ne’e.

Tanba ne’e, Governante ne’e husu reforsa liña koordenasaun entre instituisaun ensinu superiór sira ho Governu para dezenvolve di’ak liután setór edukasaun iha rai-laran.

Ha’u simu ona prekupasaun sira ne’e no alista hotu ona no Governu buka meius oinsá atu haree kestaun ne’e tanba pertinente tebes,” nia hateten.

Iha fatin hanesan Prezidente klibur Instituisaun Ensinu Superiór Privadu Timor-Leste (KIESPTL) Augostu da Conceição, informa programa prioridade haat ne’e sei implementa iha tinan oin.

“Ami konkorda no haree katak hanoin di’ak Governu nian ne’e bele loke ona oportunidade ba ami atu hetan mós biban bele hasa’e liután kualidade akadémiku nian tan ne’e sorumutu ba dahuluk ne’e oportunidade tebes atu hato’o preokupasaun ami-nian para ita-nia Ministru bele anota hela,”katak nia.

Notísia Relevante:KIESP-TL Hato’o Proposta Millaun $5.8 ba Parlamentu Nasionál

Jornalista :Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here