Imajen/MSSI.

DILI, 18 dezembru 2020 (TATOLI)—Embaixadór Austrália iha Timor-Leste, Peter Roberts, hateten Governu Austrália sei hametin lasu amizade no iha ona planu ba tinan 2021, sei fó apoiu tan millaun A$100 ba Governu no povu Timor-Leste (TL).

Diplomata ne’e hatutan, orsamentu millaun A$100 ne’ebé apoiu ba Governu no povu Timor-Leste liuhosi Ministériu Solidaridade Sosiál no Inkluzaun (MSSI) hodi dezenvolve área sira hanesan protesaun sosiál, bolsa da mãe, saúde, agrikultura, edukasaun, setór privadu no mós infrastrutura.

“Ha’u sente kontente hasoru ho vise Primeiru-Ministru no hanesan Ministra MSSI. Ami ko’alia kona-ba kooperasaun entre TL ho Austrália liuliu apoiu millaun A$100 ne’ebé ami sei halo iha tinan oin hodi bele dezenvolve iha área sosiál sira liuhosi solidaridade sosiál,” dehan Embaixadór Australia ba Timor-Leste, Pitter Robert, ba jornalista hafoin halo sorumutu ho Vise Primeuru-Ministru no Ministra MSSI iha salaun MSSI Caicoli, Dili, sesta ne’e.

Nia hatutan, Governu Austália apoiu TL tanba nasaun rua ne’e iha koopersaun ne’ebé di’ak, hanesan parseiru dezenvolvimentu no nasaun viziñu, tanba ne’e nasaun rua ne’e tenke servisu hamutuk atu promove vizaun iha prosperiedade.

Imajen/Media MSSI.

Iha fatin hanesan, Vise-Primeiru Ministru no hanesan Ministra Solidaridade Sosiál no Inkluzaun, Armanda Berta dos Santos, hato’o agreadese ba Governu Austrália tanba durante ne’e apoiu makaas ba Governu no povu Timor-Leste liuliu liuhosi MSSI.

“Ita agradese ba Governu Austrália ne’ebé mak durante ne’e apoiu Governu no povu Timor-Leste liuhosi Ministériu Solidaridae Sosiál no Inkluzasaun. Tanba ne’e mak ita hasoru malu ko’alia kona-ba programa bolsa da mae nian ne’ebé antes ita hala’o ona no espera katak tinan oin mós kontinua nafatin no mós ko’alia mós ligasaun kona-ba solidaridade sosiál nian,” nia hateten.

Maibé, nia haktuir, kona-ba bolsa da mae sei halo pilotu ruma ba programa bolsa da mae nian ba iha Konsellu Ministru maibé buat sira-ne’e hotu sei deside iha Konsellu Ministru.

“Tanba ne’e bainhira hetan aprovasaun ita bele la’o ho pillotu ida-ne’e, sei hahú hosi Rejiaun Administrativu Espesiál Oé-Cusse Ambeno (RAEOA) hafoin ba Munisípiu 12 seluk,” nia haktuir.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here