CEO Telkomcel, Yogi Rizkian Bahar. Imajen TATOLI/António Gonçalves

DILI, 17 dezembru 2020 (TATOLI)–Operadór telekomunikasaun indonéziu, Telkomcel atribui prémiu ba manan-na’in tolu ne’ebé durante ne’e uza kartaun Telkomcel, enxe pulsa no halo pakote internet unlimited barak liu.

Prémiu ne’ebé maka operadór telekomunikasaun ne’e atribui ba manan-na’in sira la hanesan, ida hetan osan $50 ho modalidade voucher hodi troka sasán iha loja iha Timor Plaza, telefone, no ipad ida no ikus maka atribui motór vário ida.

Hafoin atribuisaun prémiu, Chief Executive Officer (CEO) Operadór Telkomcel iha Timor-Leste, Yogi Rizkian Bahar, hateten prémiu ida nu’udar programa hanaran ‘Telkomcel point’, ne’ebé hanesan fó apresiasaun ba kliente ne’ebé uza  kartaun.

“Sira ne’ebé uza kartaun Telkomcel hodi halo ativasaun ba pakote internet, loron-loron halo ona deskonta ho sistema ne’ebé iha,” Jerente ne’e dehan iha salaun enkontru Telkomcel, Timor Plaza, kinta ne’e.

Atribuisaun prémiu halo tinan-ida dala-haat, husi janeiru to’o marsu no abríl hahú halo selesaun ba manan-na’in sira.

“Maibé iha situasaun COVID-19 nia laran ami labele halo, entaun ohin maka ami bele no prémiu boot liu maka motór,” nia hatutan.

Biban ne’e, Yogi  Rizkian husu ba kliente no públiku hodi nafatin uza kartaun ho di’ak, nune’e bele iha oportunidade hetan prémiu kada tinan.

Iha fatin hanesan, manan-na’in motór, Dalsio de Araujo, kontente no apresia ba prémiu ne’ebé nia hetan.

“Ohin ha’u sente kontente no la espera ha’u mós kandidatu no sai manan-na’in, sa tán hetan  motór ida ne’e grasa boot Nai Maromak ba ha’u no agradese ba Telkomcel,” nia dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here