Komunidade sira iha Comoro, kapitál Dili, entuziasmu troka voucher Cesta Bázika iha loja Leader, kinta (10/12). Imajen TATOLI/António Gonçalves

DILI, 17 dezembru 2020 (TATOLI)–Prezidente Asosiasaun TANE Konsumidór, António Ramos da Silva ‘Naikoli’, hateten daudaun husi parte asosiasaun seidauk simu keixa ruma husi benefisiáriu programa Cesta Bázika, kona-ba satizfasaun folin sasán ho modalidade empakotamentu ne’ebé aplika iha munisípiu sira no voucher iha sidade.

“To’o agora seidauk simu keixa kona-ba presu sasán Cesta Bázika, maibé ami nafatin enkoraja konsumidór sira bainhira iha buat ruma tenke hato’o keixa mai TANE,” Prezidente Asosiasaun TANE dehan ba Agência TATOLI iha ninia knaar fatin, Villa Verde, kinta ne’e.

Maski Dirijente ne’e rekoñese, nia parte rona preokupasaun barak relasiona ho folin sasán no kuantidade sasán tuir saida maka mensiona ona iha dekretu-lei, maibé nia nota katak programa ne’ebé tama programa rekuperasaun ekonómika ba kurtu prazu ne’e hanesan inisiativa di’ak husi Governu atu ajuda família asesu ai-han saudável no bele ajuda mós setór privadu.

“Dala ruma ninia mekanizmu maka falla, tanba ne’e husu Governu hadi’a no enkoraja nafatin entidade kompetente atu akompaña no fiskaliza no husu atu fallansu sira ne’e tenke kuriji. Ha’u sente programa ne’e kuaze ema hotu ko’alia no públiku kontrola liuhosi rede sosiál, inklui sosiedade sivil mós kontrola,” nia akresenta.

Ministériu implementadór ba programa ne’e maka hanesan Gabinete Ministériu Koordenadór no Asuntu Ekonómiku (MKAE), Ministériu Turizmu, Komérsiu no Indústria (MTKI), Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Programa Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here