Estudante Timor oan sira iha Filipina wainhira to iha aeroportu Internasional Nicolao Lobato ho aviaun Cebu Pacific Airlines, Sesta 6 Novembru 2020. Imajen TATOLI/Antonio Goncalves

DILI, 17 dezembru 2020 (TATOLI)—Ministériu Ensinu Superiór Siénsia no Kultura (MESSK), oras ne’e, devolve osan ba bolseiru Timoroan na’in hamutuk ema na’in 40 ne’ebé maka sosa rasik billete aviaun hodi fila mai Timor-Leste durante pandemia globál COVID-19.

Koordenadora Apoiu Estudante husi MESSK, Amelia da Silva Araújo, informa husi benefisiáriu na’in 40 ne’e, ema na’in 38, Governu liuhosi MESSK transfere liuhosi konta bankaria Embaixada Timor-Leste iha diaspora antes estudante sira fila mai Timor-Leste.

Notísia Relevante :Governu sei selu filafali osan bolseiru timoroan

Enkuantu bolseiru na’in rua iha Filipina Governu halo tranferénsia direta ba sira-nia konta bankaria.

“Estudante bolseiru na’in 2 husi Filipina mak Ministériu transfere direta osan ba sira-nia konta bankaria tanba billete aviaun sira mak sosa rasik, iha Portugal ita iha estudante na’in 10, iha Kuba na’in 25, Brazíl na’in 3 no Filipina na’in 2,” nia relata ba jornalista sira iha Salaun Igreja Katedral Villa-Verde Dili, kinta ne’e.

Montante orsamentu ne’ebé maka Governu re-imborsa ona ba kada bolseiru Timoroan ne’ebé eskola iha Kuba, Portugal no Brazíl purvolta $2.300, no $600 ba bolseiru sira iha Filipina.

Iha parte seluk, Governu mós re-imborsa ona osan purvolta rihun $45 ba estudante hamutuk na’in 16 ne’ebé halo kuarentena obrigatóriu iha nasaun Mosambique na’in 2, Brazíl na’in 5 no Portugal na’in 9 durante pandemia globál COVID-19.

Jornalista :Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here