Segundu Komandante Polísia Munisípiu Dili, Superintendente, Euclides Belo. Imajen Tatoli/Eugénio Pereira

DILI, 17 dezembru 2020 (TATOLI)- Komandu Polísia Munisípiu Dili simu ona karta konvite hosi Ministériu Edukasaun Juventude no Desportu (MEJD) atu halo seguransa ba eskola públiku sira durante prosesu fahe rezultadu ezame nasionál.

Bazeia ba pedidu MEJD nian ne’e, Segundu Komandante PNTL Dili, Superintendente Euclides Belo, hasai kedas alerta ida hodi bolu atensaun ba estudante sira atu la bele ameasa profesór sira.

“Ami apela ba estudante sira ne’ebé pasa susesu ba sira iha estudu, no sira ne’ebé la pasa lalika halo problema. Ne’e signifika, sira-nia susesu sei adianta ba tinan oin, ami husu sira labele halo fali problema hasoru mestre sira,” Euclides Belo hateten, ohin, ba jornalista iha Komandu PNTL, Caicoli, Dili.

Nia dehan, parte PNTL ba fó seguransa hodi evita alunu balun karik la pasa ezame nasionál labele halo fali ameasa hasoru dosente sira.

PNTL mós koopera ho Konsellu Polisiamentu Komunitáriu (KPK) no Ofisiál Polísia Suku (OPS) hodi seguransa eskola sira ne’ebé identifika risku ba konflitu.

Komandu PNTL mós husu ba alunu sira ne’ebé karik pasa ezame (aprovadu) lalika halo karavana  iha sidade Dili, no di’ak liu simu rezultadu ezame fila ba uma hato’o agradese ba inan no aman hodi prepara aan simu Natal no tinan foun ho haksolok.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here