Intervensaun korpu Bombeiru iha terrenu. Imajen Tatoli/António Gonçalves

DILI, 17 dezembru 2020 (TATOLI)–Sekretaria Estadu Protesaun Sivíl (SEPS) planeia ona atu destaka Bombeiru iha munisípiu Liquiçá, Ermera no manatutu.

Ho inisiativa ne’e, iha Orsamentu Jerál Estadu (OJE) 2021 prevee orsamentu ba rekrutamentu pesoál atu serbisu iha Bombeiru.

“SEPS sei halo rekrutamentu ba munisípiu tolu ne’ebé seidauk estabelese Bombeiru, ne’ebé tau ona osan iha 2021 atubele halo rekrutamentu hodi destaka iha munisípiu,” Sekretáriu Estadu Protesaun Sivíl, Joaquim José Gusmão dos Reis Martins, relata hafoin hasoru malu ho Primeiru-Ministru (PM), Taur Matan Ruak iha Palásiu Governu, kinta ne’e.

Tuir planu SEPS sei halo rekrutamentu pesoál Bombeiru hamutuk 96 hodi destaka ba munisípiu tolu refere.

Daudaun ne’e, Governu estabelese ona Bombeiru iha munisípiu Dili, Lautém, Viqueque, Lautém, Bobonaro, Aileu, Covalima, Manufahi inklui Rejiaun Administrativa Espesiál Oé-cusse Ambeno (RAEOA).

Orsamentu tinan oin prevee ba SEPS hamutuk millaun $9-resin inklui adisionál millaun $5 atu sosa karreta Bombeiru no seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here