BAUCAU, 17 dezembru 2020 (TATOLI)–Xefe Kaza Sivíl, Francisco Vasconcelos, hateten iha tempu adventu ne’e Prezidente Repúblika Francisco Guterres Lú Olo selebra natál hamutuk no fahe domin liuhosi prezente natál ba orfonatu no ema ho defisiénsia sira iha Munisípiu Baucau.

PR Lú Olo aproveita adventu hodi selebra natal hamutuk ho orfonatu no ema ho defisiénsia ka ema ne’ebé nesesidade espesiál sira, tanba balun inan-aman laiha no balun inan-aman iha maibé laiha kbiit atu haree oan sira.

Prezidente Repúblika lihosi Xefe Kaza Sivil, Francisco Vasconcelos, iha selebra natal hamutuk hodi fahe “domin” ka “prezente” ba orfonatu no ema ho dedisiénsia sira iha Baucau. Imajen TATOLI/Osória Marques.

“Iha vizita hosi Prezidente Repúblika Francisco Guterres Lú Olo iha Munisípiu Baucau ne’e, PR hakarak fahe domin ba labarik no ema ne’ebé nesesidade espesiál sira iha Munsípiu Baucau nian. Sasán ne’ebé mak Prezidente Repúblika oferese ba orfonatu no labarik defisiénsia sira mak fós, mina, sumu inklui ho osan $750. Ida-ne’e, hanesan esperiénsia di’ak ba ami ne’ebé servisu iha Palásiu Prezidénsia maibé mós ba sira-ne’ebé iha Governu no mós ba sosiedade enjerál,” Francisco Vasconcelos hateten iha serimónia natal hamutuk ho orfonatu no ema ho defisiénsia sira iha iha Sentru Konvensaun Baucau, Baucau Vila Tuan, kinta ne’e.

Entretantu, Diretora Orfonatu Maria Auxiliadora Venilale, Me. Virgilia Gaio, FMA, hateten nia sente kontente ho prezente natál nian hosi Prezidente Repúblika Francisco Guterres Lú Olo ne’ebé distribui hosi Palásiu Prezidénsia Nicolau Lobato.

“Ha’u apresia no urgullu ho ukun na’in sira tanba maske imi-nia inan-aman mate maibé ita iha aman ida de’it mak lidera nasaun Timor-Leste ne’ebé mak hadomi nia oan sira liuhosi fahe ai-han,” nia hateten.

Aleinde oferese prezente ne’e, komunidade Madre Salesiana Venilale husu ba Estadu no Governu Timor-Leste atu estabelese edukasaun ne’ebé di’ak liuhosi harii tan eskola ba labarik sira.

“Ami hakarak ukun-na’in sira atu estabelese mós edukasaun ida-ne’ebé di’ak no kualidade atu labarik sira bele asesu aprendijazen ho di’ak,” nia dehan.

Orfonatu no organizasaun labarik defisiénsia sira ne’ebé marka prezensa iha serimónia natal hamutuk ne’e mak orfonatu Maria Auxiliadora Venilale, Orfonatu Buruma, organizasaun defisiénsia nian, organizasaun esperansa no Catilosa mak simu ai-han hosi Prezidente Repúblika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here