Membru F-FDTL ne'ebé hatais farda hela halo vídeo la edukativu vorál iha Facebook. Imajen/repro Facebook

DILI, 17 dezembru 2020 (TATOLI)- Komandu FALINTIL-Forsa Defeza Timor-Leste (F-FDTL) liuhosi Unidade Polísia Militár (PM) detein ona no  halo ona investigasaun hodi  kastigu, Primeiru Sarjentu F-FDTL ho inisiál TX ne’ebé hatudu vídeo la edukativu iha rede média sosiál Facebook.

Komandante Unidade Polísia Militár (PM), Majór Abel da Costa Xavier “Niki” rekoñese membru F-FDTL ne’e uza farda militár mak halo gravasaun video la edukativu ne’e. Sá tan, vídeo ne’ viral ona iha Facebook,  tanba ne’e, nia tenke submete ba investigasaun tuir regra disiplina militár nian.

 “Ami nia membru ne’e agora ami kastigu hela no nia prosesu lao hela,” Komandante Niki hateten ba jornalista, ohin, iha Komandu Polísia Militár, Caicoli, Dili.

Nia dehan, membru ne’e hetan kastigu tuir lei militár no detein iha sela Polisia Militár iha Quintal-Boot.

“Problema ne’e tanba de’it nia tau farda militár ne’e mak kontra regra disiplina  militár nian,” nia tenik.

Kona-ba autora ida ne’ebé deskonfia fahe vídeo ne’e iha rede Facebook mós parte Investigadór Polísia Militár bolu ona no investigasaun.

“Ami kaer hotu ona, dehan nia namorada, maibé ita seidauk hatene, tanba ita la’ós atu demite tanba nia halo sala ka lae, maibé buat hotu-hotu tenke haree tuir prosesu grau sala ne’e oinsá,” Majór Niki esplika.

Komandante Niki rekoñese atitude la edukativu hosi pesoál membru F-FDTL ne’e hamonu integridade Komandu F-FDTL nian.

Demite ona membru F-FDTL ida “lori subar” ema nia bibi

Iha tinan hirak liubá Komandu F-FDTL mós hola desizaun rigorozu hodi demite kedas membru F-FDTL ida ne’ebé “lori subar” komunidade balun nia bibi iha area Taibessi, Dili.

Video komunidade sira kaptura membru F-FDTL ne’e mós virál  tiha iha rede sosiál Facebook tempu ne’ebá.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here