Komandante Unidade Polisia Militár (PM), Majór Abel da Costa Xavier “Niki” hala’o enkontru ho Komandante PNTL, Munisípiu Dili, Superintendente Xefe, Henrique da Costa no Segundu Komandante, Superintendente, Euclides Belo iha Komandu PNTL, Caicoli, Dili. Imajen/PNTL

DILI, 17 dezembru 2020 (TATOLI)-Komandante Unidade Polísia Militár (PM), Majór Abel da Costa XavierNiki”, deklara sira-nia parte prepara ona forsa hodi apoiu Komandu Polísia Munisípiu Dili hodi halo patrullamentu konjunta iha ámbitu selebrasaun loron boot Natal, 24-25 dezembru 2020 no tinan foun, 1 janeiru 2021.

Majór Niki informa kestaun ne’e durante halo enkontru koordenasaun ho Komandante PNTL Munisípiu Dili, Superintendente Xefe, Henrique da Costa no Segundu Komandante, Superintendente Euclides Belo iha Komandu PNTL, Caicoli, Dili.

Atu garante seguransa interna iha sidade Dili, Komandante Niki afirma, Polísia Militár no Polísia Dili tenke servisu hodi labele fó fatin ba kuakér sidadaun kria konflitu no krime.

“Ita besik ona natal no tinan foun importante liu ba seguransa liu-liu iha área interna liga ba área PNTL nian servisu, maibé ho despaxu Komandante Jerál PNTL, Komisáriu Faustino da Costa no Xefe Estadu Maiór Jenerál FALINTIL-Forsa Defeza TimorLeste (F-FDTL), Majór Jenerál Lere Anan Timur, hodi ami buka malu, koordena malu di’ak liután hodi hatún ita nia forsa efetivu asegura seguransa,” dehan Komandante Niki ba jornalista.

Nia dehan, membru Polísia Militár kuaze 100-resik sei halo rotasaun ba sira hamutuk ho membru PNTL Dili bele halo operasaun alargada durante oras 24.

“Ita sei fahe membru rua, ekipa ida servisu, ekipa ida prevensaun ajuda ita nia PNTL,” nia hateten.

Tuir planu, Komandu Polísia Militár sei hala’o mós enkontru ho Komandante Unidade Espesiál Polísia (EUP) hodi hametin sira-nia relasaun hodi servisu konjunta.

“Ami sei ba hasoru mós Komandante EUP para hametin kooperasaun iha área téknika,” nia hateten.

Komandante Polisia Militár ne’e apela ba juventude sira tenke kuidadu aut iha loron boot labele hemu tua kria problema no lori arma branka hodi halo ameasa no violénsia. Tanba Polisia Militár no Polísia Dili la tolera joven no Grupu Organizasaun Arte Marsiál atu kria konflitu.

Iha fatin hanesan, Segundu Komandante PNTL Munisípiu Dili, Superintendente Euclides Belo, agradese ho kooperasaun servisu ne’e no Komandu PNTL Dili mós hametin koordenasaun servisu ho Unidade Espesiál Polísia (EUP) no Igreja Katólika inklui Konsellu Polisiamentu Komunitáriu (KPK) hodi envolve iha prosesu apoiu hametin  seguransa iha sidade Dili.

Euclides husu atu povu no parte juventude no grupu sira koopera ho autoridade seguransa hodi kria hakmatek simu loron boot Natal no tinan foun ho dame.

PNTL Dili liu hosi Seksaun Tránzitu nian sei halo operasaun kontrola movimentu transporte públiku iha Terminal Becora, Taibessi, Tasi Tolu atu halo viajen ba munisipiu labele tula liu volume karreta nian hodi evita asidente.

Jornalista   :  Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here