Prezidente Repúblika Francisco Guterres Lú Olo ho Espoza PR no membru VIII Governu Konstitusionál vizita Baucau. Imajen/Mídia PR.

BAUCAU, 17 dezembru 2020 (TATOLI)—Prezidente Autoridade (PA) Munisípiu Baucau, António Augusto Guterres, relata relatóriu dezenvolvimentu iha Munisípiu Baucau ba Prezidente Repúblika (PR) Francisco Guterres Lú Olo.

Notísia Relevante: Xefe Estadu hakfodak haree eskola balun kondisaun la favoravel

Prezidente Autoridade Munisípiu Baucau, António Augusto Guterres, hateten Prezidente Repúblika ho espoza no membru VIII Governu Konstitusionál sira mai rona diretamente povu Munisipiu Baucau hosi postu administrative neen no suku 59 sira-nia preokupasaun.

Prezidente Autoridade Munisipiu Baucau, António Guterres. Imajen/Cancio Ximenes

“Administrativamente Baucau iha Postu Administrativu ne’en (6), suku 59 ne’ebé ho totál populasaun tuir ficha família ne’ebé rokolla iha tinan ida-ne’e hamutuk populasaun 184.489 ne’ebé kompostu hosi mane 93.279 no feto 91.220 ho totál uma-ka’in hamutuk 34.671,” António Guterres hateten iha diálogu PR Lú Olo ho populasaun sira iha resintu Administrasaun Munisipál Baucau, Baucau Vila Nova, kinta ne’e.

Prezidente ne’e informa, totál eskola ne’ebé eziste iha Munisípiu Baucau laran tomak, hahú hosi Ensinu Pre-Eskolar to’o Ensinu Sekundáriu Jerál no Tekniku Vokasionál sira hamutuk eskola 229. Aleinde ne’e, nia dehan, postu saúde ne’ebé estabelese ona iha Munisípiu Baucau hamutuk 28, sentru saúde sia (9) ho nia atividade sira-ne’ebé hala’o radikalmente ba prgrama siska iha 60.

Nia informa, irigasaun ne’ebé tékniku liu iha Baucau hamutuk rua mak hanesan irigasaun Aitula ne’ebé fornese bee ba natar hektare 347, ne’ebé koletiva ona 307 no nia benefisiáriu iha uma-ka’in 160. Aleinde ne’e, irigasaun Vemasse fornese bee ba natar hektare 415 ne’ebé halo ona koletiva ba 280 hektare no nia benefisiáriu haumtuk 213.

“Poténsia natar iha Munisípiu Baucau hektare 14.422 kompostu hosi Postu Administrativu Baguia iha hektare 643, Baucau Vila hektare 5.184, Laga hektare 2.264, Quelicai hektare 902, Vemase hektare 2.422 no Postu Administrativu Venilale hektare 2.293.

Entretantu, nia hatutan kona-ba poténsia to’os iha Baucau iha hektare 16.000 kompostu hosi Postu Administrativa Baguia iha hektare 3.347, Baucau Vila iha hektare 3.016, Laga iha hektare 2.372, Quelicai iha hektare 3.016, Vemase hektare 1.325 no Postu Administrativu Venilale iha hektare 2.902.

António afirma, estrada rurál, povu diretamente asesu ho signifikante ba sentru populasaun iha área rurál ne’ebé liga hosi nível suku ne’ebé konsege ona halo reabilitasaun hamutuk kilometru 165.8 ka pursentu 37%.

Kona-ba sistema fornesimentu bee-moos ho númeru uma-ka’in ne’ebé asesu mak 5.698, depois servisu ne’ebé seidauk deskonsentra mai Munisípiu Baucau mak kona-ba liña eletrisidade. Maibé iha dadus ne’ebé atualiza iha administrasaun munisípiu ne’ebé konsege rekolla katak 71% mak komunidade atinje. Entaun hosi aldeia 281 ne’e iha aldeia 226 mak asesu ona maibé aldeia ne’ebé seidauk asesu hela de’it aldeia 55.

Prezidente Autoridade Munisípiu Baucau ne’e mós aprezenta planu estratéjiku munisipál hosi tinan 2019 to’o 2023, depois hosi 2023 to’o 2030 ba Prezidente Repúblika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here