Diretór Jerál Turizmu interinu, Edson Robert Noronha Lopes, akompaña ho ekipa auditoria sira halo konferénsia impresa, iha CIT, Bidau Lecidere, kinta (17/12). Imaje TATOLI/Florêncio Miranda Ximenes

DILI, 17 dezembru 2020 (TATOLI)–Governu liuhosi Ministériu Turizmu, Komérsiu no Indústria (MTKI), sesta (18/12) sei fahe sertifikadu ba restaurante no kafetaria sia ne’ebé prenxe kritériu.

Diretór Jerál Turizmu interinu, Edson Robert Noronha Lopes, hateten sertifikasaun ne’e liuhosi projetu pilotu programa ‘Dili moos no matak’ (Dili Clean and Green). 

“Aban (18/12) ami fó sertifikadu ba restaurante no kafetaria hamutuk  sia ne’ebé prenxe ona kritériu seguransa ai-han no ijiéniku di’ak, ho esperiénsia prepara hahan ne’ebé mak moos no seguru,” Diretór Jerál interinu dehan liuhosi konferénsia impresa iha Sentru Informasaun Turíztiku (CIT, sigla portugés), Bidau Lecidere, kinta ne’e. 

Diretór Jerál Turizmu interinu, Edson Robert Noronha Lopes. Imajen TATOLI/Florêncio Miranda Ximenes

Programa ne’e, ho objetivu atu hasa’e padraun seguransa ai-han liuhosi kooperasaun integradu entre indústria, regulatóriu no instituisaun edukasaun sira. 

MTKI sei kria logo universál atu konsumidór iha konfidénsia ba esperiénsia konsume hahan ne’ebé hetan ona sertifikasaun no hatudu emblema ‘Dili moos no matak’.

Programa ne’e ajuda fó treinamentu pesoál sira ne’ebé mak serbisu iha restaurante no kafetaria atu hetan koñesimentu báziku kona-ba seguransa ai-han. 

“Ita sei kontinua implementa projetu pilotu atu hadi’a liután kualidade ai-han ba turista no mós kooperasaun entre Governu atu fornese serbisu adekuadu ba setór privadu,” nia akresenta. 

Molok hetan  sertifikadu, ekipa hosi MTKI, Ministériu Saúde no Sekretaria Estadu Profisionál no Empregu (SEFOPE), ho apoiu husi USAID’s Tourism For All project, halo inspesaun ba restaurante no kafetária hodi haree padraun seguransa ai-han,

“Ita fó treinamentu atu komprende di’ak liután padraun prátika internasionál kona-ba inspesaun ai-han atu fó apoiu  di’ak liután ba empreza sira,” nia hatutan.

Nune’e, MTKI hamutuk ho liña ministeriál, iha sesta (18/12) hahú halo lansamentu ba programa Dili Clean and Green no fahe sertifikadu dahuluk ba empreza indústria hamutuk sia ne’ebé prenxe ona padraun.

Iha biban hanesan, Resposavél ba auditoria no inspesaun jerál hosi SEFOPE, Matilde Pinto Tilman, hateten treinamentu seguransa ai-han sei realiza hosi USAID’s hafoin tun ba terrenu halo inspesaun.

“Sertifikasaun ne’e ami halo liuhosi prosesu inspensaun,” nia akresenta. 

Ekipa juri estabelese kritéria tolu hanesan inspesaun ba ijiene pesoál liuliu ema sira ne’ebé prepara ai-han, ai-han seguru no estabelesementu programa ai-han seguru atubele prenxe hafoin hetan sertifikasaun. 

Jornalista: Florêncio Miranda Ximenes

Editora: Julia Chatarina 

HAKEREK NO HATÁN

Please enter your comment!
Please enter your name here