Deputadu Jose Agostinho.Imajen/Antonio Goncalves

DILI, 17 dezembru 2020 (TATOLI)—Komisaun B iha Parlamentu Nasionál ne’ebé trata asuntu Negósiu Estranjeiru, Defeza no Seguransa, fó hanoin ba motorista sira presiza kondisaun veíkulu molok halo movimentasaun nune’e prevene asidente tráfegu iha selebrasaun Natál no Tinan Foun.

“Agora ita rai-naruk barak. Ohin loron ne’e Estrada di’ak hotu ona. Ita sempre kona asidente ne’e. Tan ne’e mak ita fó hanoin ba malu, liuliu motorista sira atu kontrola kondisaun veíkulu. Se mak kontrola movimentasaun ne’e. Ita-nia polísia sira mós tenke iha fatin-fatin,” Prezidente Komisaun B, Deputadu José Agostinho Sequeira “Somoxo”, informa ba jornalista sira iha Parlamentu Nasionál, kuarta ne’e.

Eis Ministru Defeza no Seguransa fó hanoin ne’e  tanba dala ruma atu movimenta ba munisípiu ne’e bus sira dala ruma nakonu, balun tabele no balun ba tuur fali iha leten ne’e inseguransa ida.

“Signifika katak inseguransa mós ba ita-nia komunidade sira ne’ebé movimenta ba pasa Natál no Tinan Foun ho familia sira,” nia hateten. 

Tanba ne’e, nia husu ba komunidade tomak kuandu iha situasaun sira hanesan ne’e tenke kontrola-aan hodi nunee labele iha asidente.

Veteranu ne’e mós fó hanoin ba motorista sira kontrola velosidade veíkulu nune’e prevene kualkér asidente.

Prezidente Komisaun B ne’e sujere ba autoridade seguransa tenke fó atensaun nafatin ba movimentasaun transporte públiku iha loron boot nune’e ema hotu simu tinan foun ho kontente.

Deputadu bankada FRETILIN ne’e haktuir, ohin loron veíkulu (karreta no motorizada) iha Timor-Leste barak tebes diferensa ho tempu uluk.

Prezidente komisaun defeza no segunda fó apela ba ema hotu ne’e iha veíkulu privadu no movimentasaun transporte públiku, nune’e hotu-hotu movimenta tenke kontrola kondisaun veíkulu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here