Diretor Jeral MSSI, Rui Manuel Gago Exposto

DILI, 17 dezembru 2020 (TATOLI)—Governu liuhosi Ministériu Solidadridade Sosiál Inkluzaun (MSSI), husu ba benefisiáriu sira ne’ebé simu subsídiu $200 iha fulan juñu 2020 nia laran maibé balun ne’ebé saláriu liu $500 mak simu osan refere, di’ak re-depozita fila-fali osan ne’e ba kofre Estadu.

Notísia Relevante: Benefisiáriu Saláriu $501 Mak Simu Subsídiu Sei Hasoru Lei

Diretór Jerál Ministériu Ssolidariedade Sosiál no Inkluzuan (MSSI), Rui Manuel Gago, hatutan kona-ba re-depozita fila-fali osan ba kofre Estadu ne’e MSSI la rejistu benefisiáriu hira maibé tanba bazea ba informasaun hosi Comissão Antí Corrupção (CAC) katak benefisiáriu simu subsídiu liu $500 hakarak re-depozita fila-fali osan ba kofre Estadu.

Tanba ne’e, nia informa, iha loron 15 dezembru realiza enkontru iha Gabinete MSSI ho Ministériu Adminitrasaun Estatál (STAE) no mós ho Banku Nasionál Komérsiu Timor-Leste (BNCTL, sigla portugés) konkorda hamutuk atu fasilita benefisiáriu sira re-depozita fali osan.

“Ami la rezista benefisiáriu hira mak atu re-depozita fila-fali osan  tanba dadus la’os hosi ami maibé dadus mai hosi suku, ne’ebé liuhosi Ministériu Administrasaun Estatál (STAE) mak inkamiña mai MSSI. Nune’e, ita la rejista benefisiáriu hira mak atu re-depozita fali osan maibé ita hetan informsaun hosi CAC katak ema barak ne’ebé hakarak fó fila-fali osan. Entaun MSSI servisu hamutuk ho Ministériu Finansa (MF) estabelese mekanizmu oinsá mak benefisiáriu sira re-depozita fila-fali osan kofre Estadu,” Rui Manuel Gago hateten ba jornalista sira liuhosi konferénsia imprensa iha salaun MSSI Caicoli, Dili, kuarta ne’e.

Nia hantutan, mekanizmu ba benfisiáriu sira atu hatama fila-fali osan ba kofre Estadu mak ba diretamente iha BNCTL iha Nasionál no Munisípiu tanba iha ne’ebá prenxe formatu ida-ne’ebé mak Ministériu Finansa prepara tiha ona.

“Benefisiáriu sira presiza de’it maka esklarese suku-nia naran liuliu suku ida-ne’ebé mak ita-boot sira simu osan ba ne’e. Tanba konta bankária Suku nian, MF prepara tiha ona iha BNCTL. Nune’e funsionsriu BNCTL sei ajuda prenxe dokumentu ka formuláriu ne’ebé mak ita-boot sira hakarak re-depozita fila-fali subsídiu $200 ne’e, hafoin re-depozita ba iha konta suku ida-idak nian,” nia hateten.

Nia esplika, ba benefisiáriu sira-ne’ebé atu re-depozita osan ba kofre Estadu ne’e, Governu liuhosi MSSI fó prazu to’o fulan tolu ne’ebé hahú hosi fulan janeiru-31 marsu 2021. Maibé, nia dehan,  liu tiha 31 marsu 2021 mak sei la re-depozita osan ba kofre Estadu, kompoténsia ne’e sei fó ba instituisaun relevante sira mak atu halo auditória ba benefisiáriu sira-ne’ebé mak simu osan refere.

Tanba ne’e, nia apela ba públiku tomak ajuda divulga informasaun loloos ba komunidade atu ajuda malu bele rezolve lalais problema re-depozita fila-fali osan subsídiu $200 ba kofre Estadu.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here