Adjuntu Sekretariu Jerál FFTL, Frederico Martins. Imajen Tatoli/ Hortencio Sanches

DILI, 17 dezembru 2020 (TATOLI) – Federasaun Futeból Timor-Leste (FFTL) hahú  halo melloramentu ba sir-nia servisu no hadi’a estatutu ho regulamentu internál organizasaun nian.

Logotipu FFTL no Bandeira RDTL. Imajen/FFTL

Ba ezersísiu servisu ida-ne’e, FFTL hetan apoiu másimu hosi Asian Football Confederation (AFC) no International Federation of Association Football (FIFA), oinsá mak halo ajustamentu ba estatutu organizasaun FFTL no estabelese kódigu étika, regulamentu disiplina no regulamentu governasaun nian atu bele mellora di’ak liután funsionamentu FFTL.

“FFTL servisu hamutuk ho AFC no FIFA hodi ajuta estatutu FFTL nian no hadi’a servisu balun relasiona ho dezenvolvimentu futeból iha Timor-Leste,” adjuntu sekretáriu jerál FFTL,  Frederico Martins, hateten, ohin, hodi responde Agência Tatoli liuhosi mensajen WhatsApp.

Nia dehan, durante ne’e  FFTL ne’ebé lidera hosi prezidente Francisco Jeronimo (2017-agora) konsege realiza atividade lubuk ida relasiona ho knar no kompeténsia FFTL nian, inklui dezenvolvimentu futeból nian.

Nia fó ezemplu FFTL konsege realiza atividade balun iha relasaun ho organizasaun nian mak hanesan halo kongresu nasionál iha loron 8 fevereiru, tinan kotuk no kongresu estraordináriu iha 12 dezembru, foin lalais ne’e, no hala’o mós konferénsia munisipál ba membru sira ne’ebé mak agora daudaun lao hela hanesan Baucau, Covalima, Oe-Cusse, Bobonaro, Ainaro, Manufahi, asosiasaun arbitragem no treinadór hala’o ona konferénsia hodi eleje estrutura foun.

Hosi aspetu futeból nian, nia tenik, FFTL realiza
Liga Feto Timor kompetisaun Sub-16 (U-16) iha munisípiu 11, inklui Dili Leste no Oeste, Pra Liga Futeból Salaun (Futsal) Timor – Leste, Tasa Rosa “Muki” Bonaparte.

Iha area kapasitasaun rekursu umanu  nian, FFTL halo treinamentu ka formasaun ba treinadór klube futeból sira hosi nivel D to’o B ne’ebé formadór  hosi AFC.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here