Eis Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 17 dezembru 2020 (TATOLI)—Bankada Congresso Nacional da Reconstrução de Timorense (CNRT) no bankada Partidu Libertasaun Populár (PLP) fó­-sai katak loloos ne’e alterasaun ba ezekusaun Orsamentu Jerál Estadu (OJE) 2020 nian ne’ebé loke sistema to’o ohin ne’e kompeténsia Parlamentu Nasionál nian.

Deputadu bankada CNRT, Arão Noe de Jesus da Costa Amaral, hateten regra ezekusaun estabelese kedas bainhira aprova Lei Orsamentu no Jestaun Finanseira (LOGF-sigla portugés) fixa até 15 dezembru kada tinan sistema tenke taka.

“Prosesu administrasun sira hotu to’o de’it loron 15 dezembru. Pagamentu sira-ne’ebé aprova tiha ona ka vistu ona bele halo pagamentu ne’e to’o loron 28 fevereiru tinan tuir mai. Maibé sistema prosesuál sira-ne’e hotu taka iha loron 15 dezembru,” Arão Noe de Jesus da Costa Amaral ba jornalista sira iha resintu PN, kinta ne’e.

Nia fundamenta, se Governu halo ona alterasaun sein alterasaun ba lei ne’e rasik ne’e problema tanba Estadu ne’e direitu demokrátiku tenke la’o-tuir lala’ok regra.

“Maibé realidade Governu altera ona ezekusaun orsamentu 2020 nian, ne’e mak ami dúvida tanba saida mak tenke altera hodi halo mudansa tempu ezekusaun ne’e. Se tuir LOGF karáter lei ne’e só parlamentu mak bele altera nune’e Governu ezekuta. Labele Governu mak altera fila-fali lei ida tanba mandatu konstitusionál parlamentu ninian,” nia dehan. 

Eis Prezidente Parlamentu ne’e haktuir, iha tinan hirak liubá to’o 15dezembru pagamentu ba saláriu sira-ne’e sai hotu ona maibé oras ne’e pagamentu ba saláriu seidauk iha.

“Sé governu altera bazeia ba saida, ho de’it governu nia desizaun altera de’it ona, ne’e ita la kumpri tiha ona regra ne’ebé estabelese tiha ona. Dezde 2010 to’o mai agora kuandu ita muda sistema anuál OJE ne’e uluk sistema ida komesa hosi 1 jullu até 31 juñu muda fali ba tinan sivíl ne’ebé komesa hosi 1 janeiru até 31 dezembru ne’e fó ona tempu 15 dezembru prosesu administrasaun sira hotu tenke taka ona,” nia espplika.

Nia hatutan, regrra ne’ebé estabelese taka iha 15 dezembru, hela de’it CPV sira-ne’ebé aprova tiha ona katak prosesu pagamentu ne’e bele la’o nafatin maibé prosesu administrasaun nian tenke taka hotu ona.

Nia dehan, governu altera ida-ne’e parese atu hasa’e taxa ezekusaun maibé tenke la’o tuir regra ne’ebé estabelese ona katak 15 dezembru sistema hotu-hotu taka ona.

Purtantu Deputada bankada PLP, Maria Angelina Lopes Sarmento, subliña ne’e lei loloos ne’e governu aprezenta ba parlamentu hodi halo alterasaun.

“Sé di’akliu ne’e governu aprezenta mai parlamentu mak halo alterasaun. Ha’u nafatin rekomenda sé ne’e kompeténsia parlamentu nian di’akliu governu lori mai nune’e parlamentu mak hala’o kna’ar ida-ne’e tanba bazeia ba sistema loron 15 dezembru ne’e taka ona,” hateten deputada bankada PLP ne’e.

Maske nune’e, deputada ne’e realsa, dalaruma governu altera tanba atu halo pagamentu ba obrigasaun no kompromisu sira.

Entretantu iha loron 16 dezembru 2020 ne’e liuhosi reuniaun koletiva Konsellu Ministru aprova projetu dekretu governu kona-ba alterasaun dahuluk ba dekretu númeru 14/2020, loro 23 outubru.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here