BAUCAU, 17 dezembru (TATOLI)—Diretór Kompañia ACELDA, Higino da Costa Freitas, klarifika katak durante hetan fiar hosi Governu hodi fahe ai-han iha programa Cesta Bázika ba populasaun aldeia rua ne’ebé pertense ba Suku Hera, Postu Administrativu Metinaro, Munisípiu Dili, nia parte uza produtu lokál 99%.
“Ita-nia distribuisaun Cesta Bázika ne’e 99% ita uza produtu lokál ne’ebé ACELDA rasik prodús iha fatin ne’e,” Higino da Costa Freitas hateten ba Agência TATOLI iha nia rezidénsia Aldeia Darasula, Suku Gariuai, Postu Administrativu Baucau Villa, Munisípiu Baucau, kuarta ne’e.
Nia mós rekoñese, antes ne’e Governu fó fiar duni ba ACELDA hodi kontribui ba programa Cesta Bázika maibé mosu konflitu uitoan no hapara distribuisaun provizória durante loron rua mak hafoin kontinua fali.
“Ha’u prepara duni menu ba Cesta Bázika hanesan fós, batar, fore mungu, koto, repollu no tomate. Kona-ba sasan importasaun mak pasta dente no eskova. Ita seidauk iha mákina ka industria atu prodús sasan hirak ne’e, entaun ita uza sasán importasaun,” nia informa.
Entretantu, ACELDA distribui ona Cesta Bázika ba ema na’in-2.214 iha Aldeia Moris Foun no Ailook-Laran, Suku Hera. ACELDA mós deklara ninia prontidaun atu ajuda Governu liuhosi distribuisaun Cesta Bázika bainhira Governu presiza.
Jornalista: Osória Marques
Editór: Cancio Ximenes
