Prezidente Repúblika, Francisco Guterres Lú Olo, ho nia komitiva vizita grupu HAFUKU iha iha Suku Triloka. Imajen/Mídia PR.

BAUCAU, 16 dezembru 2020 (TATOLI)–Prezidente Repúblika, Francisco Guterres Lú Olo, ho nia komitiva vizita grupu Haburas Futuru Komunidade (HAFUKU) iha Suku Triloka, Postu Administrativu Baucau Vila, Munisípiu Baucau.

Xefe Suku Triloka, Alexandre da Costa, hateten nia parte sente haksolok ho prezensa PR Lú Olo nian hodi bele motiva grupu ne’e bele la’o ba oin.

“Nu’udar autoridade lokál, ha’u sente haksolok ho prezensa Prezidente Repúblika nian iha ami-nia suku ne’e, tanba ho razaun katak haree PR direta buat ne’ebé ami halo no motiva ami oinsá bele hanoin hodi haree kondisaun komunidade sira-nian, no bele ajuda habelar di’ak liután,” Alexandre da Costa hateten ba jornalista sira iha Suku Triloka, kuarta ne’e.

Autoridade lokál ne’e hateten, Grupu HAFUKU nia atividade mak kuda fehuk, forerai, forekeli (halo ba Tahu no Tempe), tomate, stroberry no mós sira-nia atividade seluk mak oferese sasoro gratuitu ba labarik má-nutrisaun hosi tinan lima (5) mai kraik.

Nia haktuir, grupu ne’e harii tinan 10-resin ona, iha nia traballadór hamutuk na’in-14 kompostu hosi feto-mane no grupu ne’e hetan apoiu hosi Word Vision.

“Hau rekomenda ba Prezidente ne’ebé mai hanesan aman ba nasaun mai haree komunidade nia situasaun no karik serbisu ladún di’ak, entaun fó motivasaun ruma nune’e ba oin serbisu bele sai di’ak liután,” nia dehan.

Alexandre Da Costa mós hatutan, iha Suku Triloka ne’e, sira mós preokupa ho postu saúde tanba oras ne’e seidauk iha fatin tratamentu no uza nafatin sede suku tempu Indonézia nian. Sede suku ne’e agora nia kondisaun aat no seidauk hadi’a, no komunidade balu mak seidauk asesu eletrisidade.

“Iha ne’e uma-kain 17 mak seidauk asesu ba eletrisidade tanba dook hosi estrada. Hirak ne’ebe asesu ona eletrisidae ne’e 95% no 5% mak seidauk asesu,” nia informa.

Iha Fatin hanesan, Xefe Grupu HAFUKU, Maria da Costa Tilman, hatutan HAFUKU nia liafuan loloos mak ‘Haburas Futuru Komunidade’ no grupu ne’e nia rasik mak harii. 

“Grupu HAJUKU ne’e ‘Haburas Futuru Komunidade’ ne’ebé funda hosi ha’u rasik hanesan koordenadór atu halibur feto mesak sira, oinsá atu bele promove ai-han lokál sai fila-fali ba ai-han industria uma nian. Atu nune’e, hahan sira-ne’ebé halo hosi ita-nia toos ne’e labele abandona no mós hatene atu daan no tunu de’it maibé ita mós halo fila-fali ai-han sai industria uma-nian bele tau tempu naruk atu ita bele han,” nia dehan.

Nia hatutan, ai-han lokál ne’ebé iha mak hanesan fehuk, talas, aifarina no mós kulu. Nia haktuir, durante halo produsaun ne’e hahú hosi 2014 to’o mai agora ne’e tama ona tinan neen (6).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here