Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

DILI, 16 dezembru 2020 (TATOLI)—Kada tinan iha loron 10 dezembru, normalmente ministériu responsável organiza hodi harii árvore Natál iha arredór Palásiu Governu, maibé daudaun seidauk iha.

Tuir Ministru Prezidénsia Konsellu Ministru, Fidelis Manuel Leite Magalhães, tinan ne’e Governu sei tetu atu harii árvore Natál tanba okupadu ho serbisu barak hanesan elaborasaun no diskusaun Orsamentu Jerál Estadu (OJE) 2020 no 2021, situasaun COVID-19 inklui rekuperasaun ekonómika.

“Kona-ba árvore Natál iha Palásiu Governu, depois mak ita haree, tanba tinan-ne’e ita hotu hatene situasaun no Maromak mós komprende dezafíu sira ne’ebé mak Governu enfrenta. Ha’u hanoin ita mesak kristaun di’ak de’it, ne’ebé laiha ema ida mak lakohi fó importánsia ba loron Natál, maibé tanba tinan-ne’e iha serbisu todan barak iha ita nia-oin maka atu hatuur árvore Natál ne’e depois mak haree,” Ministru Fidelis informa iha Palásiu Governu, kuarta ne’e.

Aleinde ne’e, Portavóz Governu ne’e mós afirma katak atu estabelese árvore Natál iha arredór Palásiu Governu sei haree fali ba orsamentu.

“Ita haree mós ba orsamentu ne’ebé iha, maibé la signifika katak la fó importánsia ba loron Natál tanba ita hotu mesak sarani di’ak de’it,” Fidelis akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here