Ministru Asuntu Parlamentar no Komunikasaun Sosiál (MAPKOMS), Francisco Martins Jerónimo, hala’o vizita ba Rádiu Komunidade Kolelemai Bucoli, Baucau. Imajen TATOLI/Osória Marques.

BAUCAU, 16 dezembru 2020 (TATOLI)—Jerente Rádiu Kolelemai Sahe Bucoli (RCSB, sigla portugés), Josefina da Costa, hato’o nia preokupasaun ba Governu liuhosi Ministru Asuntu Parlamentar no Komunikasaun Sosiál (MAPKOMS) kona-ba menus ekipamentu iha rádiu komunidade refere.

“Ami-nia ekipamentu ba rádiu nian mak menus tebes. Ami iha laptop rua de’it no tape record ida. tanba ne’e mak defísil ba ami atu hala’o atividade rádiu nian hanesan baibain,” Jerente RCSB, Josefina da Costa, hateten ba Ajénsia TATOLI bainhira MAPKOMS Francisco Jerónimo hala’o vizita ba edifísiu rádiu komunidade refere iha Bucoli, Baucau, kuarta ne’e.

Ministru Asuntu Parlamentar no Komunikasaun Sosiál (MAPKOMS), Francisco Martins Jerónimo, hala’o sorumutu ho jerente Rádiu Komunidade Kolelemai Bucoli, Baucau. Imajen TATOLI/Osória Marques.

Josefina da Costa hateten, menus ekipamentu hirak ne’e difikulta tebes sira-nia atividade jornalizmu, nune’e notísia no programa sira rádiu nian tenke públika ka transmite hahú tuku lima (17:00) lorokraik no ramata iha tuku sanulu (20:00) kalan

“Ami dadeer ne’e halo preparasaun ba programa no halo edisaun ba notísia ne’ebé mak ami kobre ona iha terrenu, tanba ami halo publikasaun iha lorokraik to’o tuku 20:00 kalan,” jerente ne’e hateten. 

Tanbasá halo publikasaun iha lorokraik, nia hatán, tanba hetan ka simu sujestaun balu hosi komunidade katak transmite informasaun iha lorokraik mak populasaun sra hakmatek iha uma no bele atrai sira (rona-na’in) atu rona rádiu.

Jerente ne’e haktuir, RCSB nia área kobertura to’o Munisípiu Aileu, Laclo-Manututo, Maubisse, Postu Administrativu Ataúro, Natarbora, Vemasse, inklui Quelicai.

Hatán ba RCSB nia preokupasaun ne’e, Ministru Asuntu Parlamentar no Komunikasaun Sosiál (MAPKOMS), Francisco Martins Jerónimo hateten vizita ida-ne’e MAPKOMS sei tau ajenda no futuru sei haree ba sira-nia preokupasaun refere.

“Ami hatene ona ita-boot sira-nia preokupasaun kona-ba menus ekipamentu liuhosi vizitasaun ida-ne’e, depois mak haree no futuru ita sei hadi’a no sei halo avaliasaun ba rádiu komunidade sira hotu,” nia hateten.

Ministru ne’e hateten, bainhira Fundu Transferénsia Públiku sei kontinua la’o ka ativu iha tinan-ne’e hodi hala’o ba programa no notísia iha RCSB nian hafoin mak planu atu kontinua ba 2021.

“Ha’u nafatin hamriik iha ita-boot sira-nia oin atu sustenta ita-boot sira-nia kontinuidade no sustentabilidade atu rádiu komunidade ne’e moris nafatin,” Ministru ne’e dehan.

Ministru ne’e apela atu kontinua halo aprosimasaun ba parte hotu liuliu ajénsia ne’ebé durante ne’e apoiu RCSB ne’e, nune’e sira bele reforsa atividade rádiu nian.

Nia dehan, karik programa ruma ne’ebé RCSB hakarak promove no aumenta, nee di’ak liután tanba bele transmite informasaun foun ne’ebé komunidade seidauk hatene ka asesu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here