Estudante CS balun hasai foto hamutuk ho Xefe Departamentu, Martinho Mendes hafoin eventu judisium. Imajen Tatoli//Rafy Belo.

DILI, 16 dezembru 2020 (TATOLI)—Primeiru Estudante Komunikasaun Sosiál (CS), Fakuldade Siénsia Sosiál no Polítika (CISPOL), Universidade Oriental Timor Lorosa’e (UNITAL) hamutuk na’in-neen (6), kompostu husi feto tolu no mane tolu, tuir judisium iha salaun UNITAL, Becora, ohin.

Estudante sira-ne’e mak hanesan Arlinda Gomes da Costa Alves, Francisco José de Almeida, Joanico do Rosário, Joaninho da Silva Sarmento, Pedro de Almeida no Sandra da Costa Barros. Entre estudante na’in-neen (6) ne’e, na’in lima hetan klasifikasaun muito bom ka di’ak liu no ida hetan bom ka di’ak.

Sira-ne’e inskreve iha estabelesimentu ensinu privadu UNITAL ne’e hahú tinan létivu 2015 hafoin konklui sira-nia estudu iha ensinu sekundáriu, tantu privadu nune’e mós públiku, iha territóriu Timor-Leste (TL), nu’udar estudante dahuluk.

Dekana FCS, Felicidade Xavier enkoraja estudante judisionista sira atu kontinua defende almamater UNITAL nian tuir lema universidade nian katak “Harii, Hadi’a no Haburas”.

“Imi tenke tane almamater universidade (UNITAL) iha ne’ebé de’it. Almamater ne’e mak hein, bali no sadi’a ita-boot (estudante) sira nu’udar inan ida durante estudu; iha Koñesimentu no matenek,” manorin-na’in UNITAL ne’e enkoraja tan perante judisionista, inan-aman no família sira.

Nia mós hato’o agredese ua’in ba dosente no irarkia Fakuldade inkluzivamente CISPOL, universidade no FUNATIL (Fundasaun Aas uain Timor-Leste) inklui inan-aman sira tanba apoiu ona oan sira bele hakat tan pasu ida iha sira-nia jornada akadémika.

Ba judisionista sira, akadémiku UNITAL ne’e hato’o kongratulasaun no dezeja votu susesu nian. “Parabéns ba ita-boot (estudante) sira hotu”.

Iha fatin hanesan, Francisco Almeida, nu’udar reprezentante judisionista sira akresenta, susesu ne’ebé atinji la’ós milagre maibé ne’e prosesu ida.

Totál estudante ativu CS UNITAL, hahú tinan létivu 2015 to’o agora, hamutuk na’in 132, ne’ebé inklui mós estudante judisionista na’in-neen (6) ne’e.

Entretantu, atividade judisium, ohin, alende estudante finalista CS inklui mós husi Departamentu Relasaun Internasionál hamutuk na’in-ualu (8) no Administrasaun Públika na’in-18. Nune’e, totál judisionista hamutuk na’in-32.

Departamentu CS estabelese iha UNITAL iha 2015 no hamahon aan iha CISPOL bazea bá nesesidade komunidade nian ba asesu informasaun. Kursu ne’e hanesan departamentu Komunikasaun Sosiál ne’ebé kompetetivu iha merkadu serbisu iha futuru bá foinsa’e sira, iha área espesialidade bá jornalista, étika públiku iha sosiedade nia laran, liuhusi edukasaun peskiza no dedika aan bá merkadu serbisu (vizaun) no misaun katak Dezenvolve edukasaun iha área Komunikasaun Sosiál.

Tuirmai, instalasaun aprendijazen ho fundamentu bá guia 60% esplikasaun teória no 40% aplikada, Instalasaun bá sistema aprendijazen adotivu no sensitivu bá progresu teknolojia no siénsia koñesimentu no espiritu “entrepreneur” no hala’o mitra serbisu ho setór privadu no instituisaun espesialista mídia ho sentidu hodi prenxe kualidade graduasaun iha parte aplikada serbisu.

Realizasaun bá publikasaun jornál sientífiku ho nia sentidu  atu motiva no hamahon iha prosesu Komunikasaun Sosiál, hala’o peskiza ho nia sentidu hasa’e kualifikadu Komunikasaun Sosiál nó fó kontribuisaun bá varias kauzas iha sosiedade nia laran. Inklui, instalasaun bá programa kontinuidade atu hala’o progresu bá kualidade personalia edukadór, inovadór, motivadór, pensadór iha área edukasaun.

Jornalista: Rafy Belo

Editór: Cancio Ximenes

HAKEREK NO HATÁN

Please enter your comment!
Please enter your name here