Prezidente Repúblika, Francisco Guterres 'Lú-Olo'. Imajen Tatoli/Antonio Goncalves

DILI, 16 dezembru 2020 (TATOLI)—Prezidente Repúblika, Francisco Guterres Lú Olo, promulga Dekretu-Lei aprova hosi Governu atu fó Insentivu Finanseiru Estraodináriu ba suku sira.

Insentivu finanseiru estraordináriu ne’e sei atribui ba xefe suku sira, xefe aldeia sira, pesoál ne’ebé fó apoiu ba Administrasaun Suku no kolaboradór sira,  nu’udár rekoñesimentu hosi Estadu ba serbisu sira- ne’ebé ita-nia ema sira tenke halo hodi ajuda Governu implementa programa asisténsia ba família sira iha ámbitu COVID-19.

Komunikadu hosi Prezidénsia Repúblika ne’ebé fó sai iha loron 16 dezembru hateten, programa rua ne’e mosu atu hamenus susar ba família sira hafoin moras COVID-19 sai ameasa ba mundu tomak no Timor-Leste tama iha Estadu Emerjénsia atu hasees-aan hosi kalamidade públika ne’e.

Iha nível mundiál, nasaun ida-idak tenke duni foti medida prevensaun oioin atu prevene no kombate moras ne’e, ne’ebé ikus mai lori impaktu boot ba ekonomia nasionál no konsekuentemente hatodan kondisaun finanseira no sosiais ba família ida-idak no populasaun en-jerál.

Iha fulan hirak ba kotuk ne’e, Governu dezenvolve programa asisténsia oioin atu hamenus todan finanseiru ba família ida-idak liuhosi “Subsídiu Uma Kain” ne’ebé konkluídu tiha ona no programa “Cesta Básika” iha faze ezekusaun.

Papel xefe suku sira no xefe aldeia iha traballu preparatóriu to’o ezekusaun programa hirak ne’e importante tebe-tebes.  Sira-nia papel importante tebes iha rejistu no atualizasaun “ficha da família” ne’ebé integra iha Livru Rejistu Uma Kain no Livru Administrasaun Suku, rai dokumentu sira, distribuisaun osan, sasán no voucher, utilizasaun konta bankária no mobilizasaun ema.

Subsídiu estraordináriu ne’e sei selu dala ida de’it no sei transfere ba konta bankária suku nian.  Xefe suku ida-idak sei simu $200, Xefe Aldeia  $100 no  Pesoál Apoiu ba Administrasaun Suku sei simu mós $100.

Valór Kompensasaun ba kolaboradór sira-ne’ebé fó apoiu ba Governu fahe “Cesta Básica” iha suku sira sei define liuhosi diploma ministeriál hosi Ministru Administrasaun Estatál.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here