Prezidente Repúblika, Francisco Guterres ‘Lu Olo’. Imajen Tatoli/António Gonçalves

BAUCAU, 16 dezembru 2020 (TATOLI)–Prezidente Repúblika (PR), Francisco Guterres Lú Olo, ofisialmente deklara ona ba povu Baucau katak nia parte simu ona Orsamentu Jerál Estadu (OJE) tinan fiskal 2021 nian.

Prezidente Repúblika Lú Olo hateten, orsamentu ne’ebé Parlamentu Nasionál (PN) enkamiña ona ba meza PR nian, Xefe Estadu sei uza kompeténsia hodi tetu molok deside destinu OJE 2021 nian.

“Orsamentu Jerál Estadu 2021 nian ne’e iha ona Prezidente Repúblika nia liman, entaun PR sei haree oinsa para hola desizaun kona-ba ida-ne’e,” PR Lú Olo hateten ba populasaun sira iha Suku Caibada Makasae hafoin hala’o vizita ba Eskola Sekundária Jerál (ESJ) Kilik Uaiga’e, kuarta ne’e. 

Aman ba nasaun ne’e mós dehan, bainhira deside ona destinu OJE 2021 nian, espera Governu bele la’o ba oin ho di’ak liután.

“Governu bele la’o ba oin, hodi nune’e labarik sira-nia eskola nian mós bele di’ak liután. Karteira bele di’ak. Uma sira bele taka halo didi’ak para labarik sira eskola ho kondisaun ida-ne’ebé dignu,” nia dehan.

Xefe Estadu hatutan, la’ós kondisaun fíziku ne’ebé estudante sira tuur iha laran maibé bee-moos no saneamentu mós importante no bele tama iha eskola sira para bele la’o ho di’ak no iha mós kampu desportu ba estudante sira.

“Pelumenus, kondisaun ba profesór sira-nia hanesan kadeira, armáriu no material sira seluk ne’e iha para uza hodi hanorin labarik sira,” Lú Olo dehan.

Iha parte seluk, Vise Prezidente Parlamentu Nasionál (Vise-PPN), Luis Roberto, hateten informasaun ne’ebé iha ne’e OJE 2021 enkamiña tiha ona ba PR.

“Segunda semana (14/12) ne’e enkamiña tiha ona ba PR, ne’ebé se promuga lalais ne’e di’ak liután, para tama ba janeiru 2021 ne’e ezekuta ona ho orsamentu karáter normál,” Luis hatete.

Entretantu Orsamentu Jerál Estadu (OJE) 2021 nian ne’ebé iha billaun $1.895 ne’e hetan ona aprovasaun ho votus a-favór 44 kontra no abstensaun zero ne’e PR sei estuda, tanba tuir kompetensia PR nian sei estuda durante loron 30.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here