Komandu Polísia Eskuadra Don Aleixo, Munisípiu Dili halo investigasaun ba mane na’in-rua ne’ebé deskonfia lori samurai ameasa alin feto ida. Imajen Tatoli/Eugénio Pereira

DILI, 16 dezembru 2020 (TATOLI)- Hasarahun naruk,  isin metan morena, fuuk tesi kabeer badak séntimu ida, isin boot no nakonu ho tattoo iha liman no isin-lolon tomak, hatudu mane forte loos. Na’in-ida seluk fuuk tau jell kabeer, isin-mutin, mane forte mós.

Ironia tebes. Isin forte mane loos, lori samurai ameasa alin feto ida iha estrada públiku Suku Bairru-Pité, segunda kalan (14/12), purvolta tuku 22:00 Otl.

Kronolojia ba akontesimentu ne’e tuir polísia nia investigasaun katak, momentu ne’ebá mane isin forte na’in-rua lori motór ho kondisaun lanu no lori samurai.

Mane na’in-rua  ne’e tenta soke alin feto ida. Maibé sorte aat, sira la konsege soke alin feto no sira mak ho motór monu fali ba rai no ho ta’uk halai husik hela sira-nia motorizada iha area rotunda Polísia Bairru-Pité nian.

Liu minutu balun, parte Polísia Nasionál Timor-Leste (PNTL) to’o iha fatin akontesimentu hodi buka tuir mane na’in-rua hanesan suspeitu ne’e, maibé  la hetan sira-nia ain-fatin tanba halai tiha. Mezmu  nune’e, PNTL halo kedas apreensaun ba motorizada ne’ebé sira na’in-rua soe hela.

Iha loron tuir mai, tersa (15/12), mane ida  ne’ebé konsidera hanesan suspeitu  ho inisiál DGS voluntáriamente entrega aan ba polísia atu bele hasai sira-nia motór. Maibé tanba komete ona krime “ameasa” alin feto ida ho samurai, maka polísia uza nia autoridade hodi halo kedas detensaun ba suspeitu DGS submete ba investigasaun.

Hosi investigasaun ne’e, Polísia deskobre tan nia mane-maluk ida ne’ebé hamutuk ho nia hemu lanu lori motór ho samurai ba ameasa alin feto ne’e.

Iha kuarta (16/12), membru Konsellu Polisiamentu Komunitária (KPK) lori kedas suspeitu AS nu’udar mane-maluk hosi suspeitu DGS  ba iha Polísia hodi halo prosesu investigasaun no rekolla sasán evidénsia sira hanesan motorizada Beat ida hodi asegura ona iha Eskuadra Polísia.

“Ha’u maka lori motór kolega AS ne’e tuur iha kotuk, ami lanu, maibé ami la lori samurai,” suspeitu DGS hateten ba polísia durante presta deklarasaun iha Polísia Eskuadra Don Aleixo, Munisípiu Dili.

Parte PNTL konsidera suspeitu na’in-rua komete krime arma branka 7/2017 ne’ebé ko’alia kona-ba bandu lori sasán kro’at no sasán kontra bandu atu emeasa no hakanek ema nia isin lolon no habadak ema ninia vida.

Suspeitu na’in rua sei kumpre detensaun  oras 72 iha sela Polísia Caicoli Dili, hodi hein prosesu investigasaun no aprezenta ba Ministériu Públiku.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here