Ministru Justisa, Manuel Cárceres da Costa no Ministra Saúde, Odete Maria Freitas Belo, hasai foto hamutuk bainhira asina MoU entre parte-rua. Imajen Tatoli/Egas Cristovão

DILI, 16 dezembru 2020 (TATOLI)-Ministériu Justisa ho Ministériu Saúde, ohin, asina nota entendimentu  (MoU) hodi fó  asisténsia medika ba dadur sira iha prizaun-laran.

Akordu ne’e asina direita hosi Ministru Justisa, Manuel Cárceres da Costa no Ministra Saúde ,Odete Maria Freitas Belo, iha edifísiu Ministériu Justisa, iha Caicoli, Dili.

Dadur sira iha Prizaun Becora. Imajen/dok.espesiál

Manuel Cárceres da Costa, hateten, akordu ne’e atu reforsa tan de’it kooperasaun ne’ebé eziste tiha ona entre Ministériu Justisa ho Ministériu  Saúde, kona-ba atendimentu servisu saúde ba prizioneiru sira iha Prizaun  Becora, Gleno no Suai.

Daudaun ne’e iha Prizaun Becora, Gleno no Suai iha ona estabelesimentu postu saúde ne’ebé koloka mós pesoál saúde  hodi fó  asisténsia  ba dadur sira ne’ebé presiza hetan atendimentu saúde.

“Ohin, ita formaliza tiha akordu ne’e atu parte rua (MJ no MS) ida-idak hatene nia obrigasaun, tanba mezmu dadur sira prizaun laran, maibé sira iha direitu hanesan ema  iha li’ur hodi  hetan atendimentu médika,” Ministru Justisa, Manuel Cárceres da Costa, hateten ba Agência Tatoli.

Daudaun ne’e iha dadur hamutuk  na’in -760 ne’ebé koloka iha prizaun tolu; Becora, Gleno no Suai.

Jornalista   : Nelson de Sousa

Editór        : Francisco Simões  

HAKEREK NO HATÁN

Please enter your comment!
Please enter your name here