Prezidente Komisaun B, Deputadu José Agostinho Sequeira Somoxo.

DILI, 16 dezembru 2020 (TATOLI)—Prezidente Komisaun B (Negósiu Estranjeiru, Defeza no Seguransa), Deputadu Agustinho Siqueira “Somoxo”, hateten konvensaun Nova Iorke kona-ba rekoñesimentu no ezekusaun sentensa estranjeira importante ba Timor-Leste tanba Timor-Leste hola-parte Organizasaun Nasaun Unida (ONU).

Prezidente Komisaun B ne’e fundamenta, konvensaun sira-ne’ebé selebra ona iha ONU entaun nasaun membru sira tenke halo ratifikasaun.

Nia subliña, ezisténsia konvensaun ne’e atu regula dispozisaun legál sira hotu tanba mportante liu iha sosiedade kona-ba moris no asegura protesaun legál ba parte sira-ne’ebé iha relasaun jurídika, inklui relasaun jurídika atividade ekonómika nian.

“Konvensaun ne’e importante ba Timor-Leste tanba primeira vez konvensaun ne’e selebra iha 1958, agora mak to’o Timor-Leste. Ha’u mós hanoin katak Timor-Leste tenke haree konvensaun sira-ne’ebé mak importante ba Timor-Leste nune’e ita ratifika konvensaun ruma labele konvensaun ne’e blokeia fali ita-nia dezenvolvimentu ka ita-nia hakarak ruma ba futuru,” Deputadu Somoxo informa ba jornalista sira, iha Parlamentu Nasionál, kuarta ne’e.

Deputadu Somoxo fundamenta, razaun konvensaun ne’e importante tanba Timor-Leste mós hola-parte komunidade internasionál ne’ebé iha Oranizasaun Nasaun Unida (ONU) nia mahon.

“Timor-Leste la’ós rai ida izoladu, ita mós sai membru ONU ne’e konserteza konevsaun hotu-hotu ne’ebé ligadu bai ta-nia polítika esterna no interna. Tanba ne’e mak konevensaun rekoñesimentu no ezekusaun sentensa estranjeira ne’e Timor-Leste tenke ratifika,” nia esplika.

Entretantu, Prezidente Parlamentu Nasionál, Deputadu Aniceto Longuinhos Guterres Lopes fó prazu loron 20 ba Komisaun B no A atu elabora relatóriu no paresér hafoin aprezenta ba plenária hodi halo diskusaun.

Maibé Prezidente Komisaun B ne’e fó-sai katak prazu loron 20 ne’e sei estende ba fulan-janeiru tanba iha fulan-dezembru nia laran ne’e, loron feriadu barak liu.

“Iha fulan-janeiru mak ami sei halo audiénsia ho Ministériu Negósiu Estranjeiru no Kooperasaun (MNEK) no Ministériu Justisa (MJ),” nia hateten. 

Iha loron tersa ne’e, Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, baixa proposta-rezolusaun númeru 3/V(2a)-adezaun Timor-Leste nian ba Konvensaun Nova Iorke kona-ba rekoñesimentu no ezekusaun sentensa abritrál estranjeira ba Komisaun A (Justisa no Konstitusionál) no Komisaun B (Negósiu Estranjeiru, Defeza no Seguransa).

Notísia Relevante: PN sei diskute proposta-rezolusaun rekoñesementu no sentensa arbitrál estranjeira

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here