Membru PNTL bainhira halao seguransa. Imajen Tatoli/Antonio Goncalves

DILI, 16 dezembru 2020 (TATOLI)-Atu hametin liután liña koordenasaun servisu polísia nian, Komandante Jerál Polísia Nasionál Timor-Leste, Komisáriu Faustino da Costa, sei fó orden operasaun ba komandante polísia hotu iha territóriu nasionál liuhosi parade prontidaun PNTL.

Notísia Relevante : Komandu PNTL hasai despaxu ba membru polísia tenke selu Ró Nakroma

Orden servisu ne’e, Komisáriu Faustino da Costa, akompaña hosi Segundu Komandante Jerál PNTL, Komisáriu Mateus Fernandes, sei hasai liu hosi serimónia parade prontidaun PNTL ne’ebé sei realiza iha sesta (18/12) iha Komandu PNTL, Munisípiu Bobonaro.

Informasaun ne’ebé Agência Tatoli rekolla hosi Gabinete Komandu Jerál PNTL, hatuir  katak serimónia parade ne’ebé sei hala’o iha tuku 15:00 Otl, Komisáriu Faustino da Costa, sei fó orden perante prezensa komandante polísia hotu iha territóriu nasionál, Komandante Unidade, Xefe Servisu Departamentu no Sentru Formasaun Polísia hodi rona direita mensajen importante sira para asegura seguransa iha selebrasaun loron boot Natál 2020 no tinan foun 2021.

Iha parede ne’e, Komandante PNTL  sei fó orientasaun ba Komandante PNTL Munisípu Bobonaro, Superintendente Xefe, Octavio de Araújo Bucar no Komandante Unidade Patrullamentu Fronteira (UPF), Superintendente, João Sancho Pires no Komandante Unidade Polísia Marítima, Superintendente Basilio de Jesus, atu hametin liña koordenasaun servisu kontrola ema labele halo atividade negósiu ilegál no viajen ilegál hodi prevene propagasaun surtu COVID-19.

Orientasaun servisu ne’e PNTL ezekuta tuir Konstituisaun RDTL artigu 147 kona-ba knaar Polísia ho forsa seguransa ne’ebé sita servisu Polísia tenke defende legalidade demokrátika no garante seguransa interna ba sidadaun hotu no la inkilina ba partidu, prevensaun krime tenke bazeia ba respeitu direitus umanu no Lei maka determina regra no regulamentu ba polísia no forsa seguransa no forsa sira seluk.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here