KBRI halo preparasaun ba asina akordu kooperasaun entre Ministériu Finansa ho KBRI-Dili iha edifísiu KBRI-Dili, maibé muda derrepente ba fali edifísiu MF, Aitarak Laran. Imajen Tatoli/Hortencio Sanches

DILI, 16 dezembru 2020 (TATOLI) – Governu Indonézia liuhosi sira-nia embaixada iha Dili, Timor-Leste, ohin, estabelese nota entendimentu ida ho Ministériu Finansa (MF) hodi  apoia fundu ho montante $200,000 atu ajuda Ministériu Saúde sosa ró ambulánsia.

Ró ambulánsia  ne’e  bele ajuda transporta pasiente sira hosi Postu Administrativu Atauro mai halo tratamentu intensivu iha Ospitál Nasional Guido Valadares (HNGV), Dili.

“Apoiu  ida-ne’e sei fasilita ita iha area saúde nian. Ita sei sosa ró ambulánsia ida hodi bele fasilita ita-nia populasaun Atauro ne’ebé atu mai halo tratamentu saúde iha Dili ho lais liu,” diretór Jerál Jestaun Mobilizasaun Rekursu Externa, António Freitas, informa ba Agência Tatoli, bainhira remata serimónia   asina nota entendimentu ho Embaixadór Repúblika Indonézia nian mai TL, Sahat Sitorus iha edifísiu Ministériu Finansa, Dili.

 Iha akordu kooperasaun ne’e, Governu Indonézia sei transfere fundu ho montante  $200,000 mai Timor-Leste iha loron 31 dezembru 2020.

António Freitas relata, osan ne’e sei aloka hotu ba hola de’it ró ambulánsia, maibé iha balansu ruma ba osan ne’e mak sei bele hola tan ekipamentu seluk ne’ebé saúde presiza no fó treinamentu ba ema sira atu halo operasaun ba ró ne’e.

Embaixadór Sahat Sitorus, hateten, apoiu ne’e mai hosi fuan-laran povu no Estadu Indonézia,  atu tulun nia amigu Timor-oan, liuliu Atauro-oan sira para iha netik transporte saúde nian hodi lori sira mai halo tratamentu saúde iha Dili.

“Ha’u lori Governu Indonézia nia naran hakarak hato’o ajudu ne’ebé fó ho laran tebes. Ajudu ne’e atu hametin liután relasaun amizade entre povu no nasaun rua,” Embaixadór Sahat Sitorus haktuir.

Ajenda falla uitoan

Tuir ajenda protokolár nian, serimónia asina akordu kooperasaun ba apoiu hosi Governu Indonézia ne’e, atu hala’o iha edifísiu Embaixada Repúblika Indonézia (KBRI, sigla Indonézia) iha Dili, iha tuku 12:00 Otl.

KBRI halo preparasaun feitu hotu ona, inklui halo kedas live virtuál hosi KBRI Dili ba Jakarta, maibé derrepente de’it, KBRI simu informasaun iha minutu ikus katak MF husu muda fatin asina akordu ne’e ba fali iha edifísiu  Ministériu Finansa nian.

Tuir ajenda ne’ebé iha mós akordu entre parte rua ne’e atu asina diretamente hosi Ministru Finansa, Rui Gomes ho Embaixadór Sahat Sitorus. Maibé, tanba Ministru Rui Gomes iha servisu importante seluk, maka delega hikas kompeténsia ba diretór jerál Jestaun Mobilizasaun Rekursu External, António Freitas.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here