Logotipu UNTL.

DILI, 16 dezembru 2020 (TATOLI)—Governu liuhosi Ministériu Ensinnu Superiór Siénsia no Kultura (MESSK), Longuinhos dos Santos, hateten ninia parte seidauk kurize materia teste ba estudante hamutuk 6.710 atu asesu Universidade Nasionál Timor Lorosa’e (UNTL) no Institutu Politéknik Betano (IPB) husi rejime espesiál nian.

MESSK iha loron 23 fulan-novembru 2020 realiza ona teste ba kandidatu asesu UNTL hamutuk 6.710 iha Munisípiu 12 inklui Rejiaun Administrativa Espesiál Oe-Cusse Ambeno (RAEOA).

Notísia Relevante:Governu fó teste ba kandidatu asesu UNTL hamutuk 6.710

:Governu liuhosi MESSK daudaun ne’e hein hela prosesu koresaun pontus ezame nasionál husi Unidade Kuríkulu Nasionál (UKN) Ministériu Edukasaun Juventude no Desportu (MEJD).

Diretór Jerál Ministériu Ensinu Superiór Siénsia no Kultura (MESSK), Maria Filomena Lay, deklara katak to’o agora Komisaun Asesu Engeresu Ensino Superior (KAES) seidauk realiza prosesu koresaun materia teste ne’e.

“Ita seidauk realiza koresaun ba pontus ezame sira ne’e tanba fasilidade ne’ebé ita atu utuliza ne’e MEJD nian entaun ita tenke hein lai sira nia prosesu koresaun ba pontus ezame nasionál ne’e finaliza ona mak ita foin bele hahú fali,” nia hateten ba jornalista sira iha edifísiu MESSK Colmera kuarta ne’e.

KAES halo ona enkontru ho ekipa  MESSK nian no iha tempu badak sei haruka karta koñesimentu ba MEJD hodi hetan autorizasaun.

“Ami foin mak enkontru ohin para atu haruka ona karta ba MEJD para atu aselera prosesu koresaun ne’e maibé agora ita seidauk iha desizaun ida serteja bainhira mak atu realiza koresaun ne’e,” katak nia.

Jornalista :Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here