Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (16/12). Imajen TATOLI/Egas Cristovão

DILI, 16 dezembru 2020 (TATOLI)–Liuhosi reuniaun Konsellu Ministru (KM), ezekutivu sira aprova ona projetu dekretu Governu kona-ba alterasaun dahuluk ba dekretu númeru 14/2020, loron 23 outubru.

Ministru Prezidénsia Konsellu Ministru, Fidelis Manuel Leite Magalhães, hateten diploma ne’ebé aprezenta hosi Ministru Finansa, Rui Augostu Gomes, kona-ba ezekusaun Orsamentu Jerál Estadu (OJE) 2020 ne’ebé fó biban atu estende loron ezekusaun.

“Ho alterasaun ne’e, permite sistema bele loke to’o iha loron 17 dezembru 2020 tanba ita iha serbisu barak mak tenke rezolve hanesan Kustu Produtu Vendidu (CPV) tenke rezolve atubele jere sasán ho forma organizadu no fasilita ezekusaun ne’ebé di’ak liu,” Ministru Fidelis informa hafoin ramata reuniaun KM iha Palásiu Governu, kuarta ne’e.

Antes ne’e, tuir dekretu Governu uluk sistema tenke taka ona iha loron 15 dezembru.

“Ida-ne’e sei fasilita liu diresaun jerál sira atubele organiza sira-nia an no asegura ezekusaun. Tinan-tinan ita hatene katak sistema ne’e iha períodu ida, ne’ebé bainhira to’o períodu ne’e liu maka ita labele halo ona CPV tanba tuir dekretu Governu, loron ne’ebé taka sistema ne’e liu ona maibé ezekusaun sei la’o hela no tanba orsamentu tutuir malu de’it, entaun Ministru Finansa propoin hodi estende ba loron ezekusaun,” Portavóz Governu esplika.

Nia subliña, Ministériu Finansa sei halo esforsu hotu atu Governu bele iha disiplia iha ninia ezekusaun.

“Loron taka sistema mak iha loron 17 dezembru, bainhira liu ida-ne’e labele ona loke tan tanba Governu konsolida nia relatóriu sira,” nia hatutan.

Bazeia ba portál transparénsia ne’ebé Agência TATOLI asesu, hosi totál orsamentu orijen $1.497.042.620, kompromisu $160.001.087,57, obrigasaun $90.213.499,21 no atuál $1.007.309.286,97, saldu $239.517.343,42, ne’ebé reprezenta ezekusaun 73,3%.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here