Kay Rala Xanana Gusmão simu dokumentu livru rezisténsia ne'ebé hakerek hosi Xanana Gusmão ho Titulu TEMATICA DE GUERRA SAUDACAO A II BRIGADA VERMELHA NOQUESTOES TATICAS OU OPERACIONAIS APRENDER A GUERRA, ne’ebé durante ne’e família Saudozu Lekihare no Antonio Aparicio Guterres prezerva hela. Serimónia entrega dokumentu ne’e realiza iha Xanana Gusmão nia rezidénsia iha Lecidre, 16 dezembru 2020. Imajen Tatoli/Antonio Goncalves.

DILI, 16 dezembru 2020 (TATOLI)—Reprezentante família hosi saudozu Germano do Rosário Amaral koñesidu ho naran Germano Lekihare ka Germano Nasahoke  no saudozu António Maria Aparício Guterres, ohin, entrega livru rezisténsia tolu (3) ba Komandante Em Xefe Kay Rala Xanana Gusmão iha Lecidere, Dili. 

Iha serimónia ne’e selebra ho asina termu entrega livru rezisténsia entre família saudozu na’in-rua no Xanana Gusmão, família mós entrega livru orijinál no nia kopia ba Xanana Gusmão, no Komandante Em Xefe Kay Rala Xanana Gusmão entrega sertifikadu ba família sadozu na’in-rua.

Saudozu Lekihare iha imajen ne’e (hatada hela ho sinal ne’e) hola parte iha prosesu funu nian. Imajen/Espesiál.

Saudozu Lekihare nia knua loloos ne’e iha Postu Administrativu Baguia, Munisípiu Baucau, maibé boot iha Postu Administrativu Uatulari, Munisípiu Viqueque. Saudozu Lekihare moris iha Uatulari iha loron 10 maiu 1953 no hakoru peregrinasaun hosi mundu iha loron 01 dezembru 1988 iha Baucau.

Livru ka dokumentu tolu (3) ne’ebé família saudozu na’in-rua nian entrega ba Xanana Gusmão ho títulu Livro Temática da Guerra, Livro Saudação a II Brigada Vermelha no Livro Questões Táticas ou Operacionais Aprender a Guerra, no sei iha tan dokumentu lubuk boot ne’ebé daudaun ne’e família buka-tuir informasaun. Livru ka dokumentu rezisténsia tolu (3) ne’e nia eskritór mak Kay Rala Xanana Gusmão.

Xanana Gusmão agradese ba reprezentanta família hosi saudozu Germano do Rosário Amaral “Lekihare” ka Germano Nasahoke no família saudozu António Maria Aparício Guterres ne’ebé halo prezervasaun ba dokumentu rezisténsia refere.

Xanana Gusmao simu no entrega livru (dokumentus Resistensia) neebe hakerek husi Xanana Gusmao, ho Titulo TEMATICA DE GUERRA SAUDACAO A II BRIGADA VERMELHA NOQUESTOES TATICAS OU OPERACIONAIS APRENDER A GUERRA, durante nee Familia sira subar no raihela. Seremonia entrega nee iha residensia Xanana nian iha Lecidre 16/12.Imajen Tatoli/Antonio Goncalves

“Primeira vez ita-nia serimónia oin ne’e bele entrega dokumentu hosi rezisténsia ninian. Balun ha’u buka tún sa’e mós la hetan, komesa hosi funu ne’ebé ha’u husik hela iha uma, ha’u fila-fali mai ema sunu hotu ona. Foin lalais ha’u buka iha abrigu rua iha ponta-leste maibé dokumentu ne’e to’os tiha ona tanba kleur ona,” Xanana Gusmão informa liuhosi serimónia entrega dokumentu ka livru rezisténsia ne’e.

Eis Prezidente Repúblika ne’e fundamenta, razaun buka dokumentu rezisténsia atu halo tradusaun ba lian Tetun tanba dokumentu rezisténsia kona-ba konferénsia reogranizasaun funu uza lian portugés nune’e Timoroan hotu bele hatene istória rezisténsia nian.

Xanana dehan sorte fila hosi Indonézia tama auto kuarentena iha nia rezidénsia Balibar hodi halo tradusaun dokumentu ne’e ba lian Tétun.

“Ha’u kontente tebes bainhira ha’u rona família rua ne’e hakarak entrega dokumentu orijinál ne’e ba ha’u,” Xanana dehan.

Xanana esplika, temátika guera ne’e asuntu importante tebes bainhira iha ai-laran tanba bainhira funu tama ita la preparadu kona-ba Guerra, maibé idak-idak ho nia servisu no ninia servisu ne’e mak ho kakutak.

Nune’e mós saudasaun  II Brigada Vermelha ne’e nu’udar mensajen oan ida, maibé kestaun tátika operasionál tanba ne’e importante tanba labele hanoin mak tiru-malu de’it maibé tenke iha estratéjia.    

Nia dehan, halo funu ne’e la’ós tiru-malu de’it maibé tenke ho planu estratéjiku ba buat hotu-hotu atu enfrenta hasoru funu-maluk tanba funu ne’e iha lei, regra no prinsípiu sira tantu ofensiva no defensiva.

Eis Ministru Defeza no Seguransa ne’e haktuir, povu Timor-Leste nia funu únika iha mundu.

Reprezentante família saudozu, Juvencio de Deus do Rosário, agradese ua’in ba Aman Maromak ne’ebé ho bensaun no kbi’it tomak, iha tempu naruk hosi luta libertasaun pátria ba País doben ida-ne’e.

“Ami nia aman sira iha tempu naruk nia laran ho sira-nia kbiit no forsa tomak kaer ba prinsípiu “Pátria ou Morte”, sira konsege asegura no prezerva dokumentu importantísimu ba ita-nia luta libertasaun pátria durante tempu rezisténsia ho sira-nia vida tomak. Dokumentu rezisténsia hirak ne’e konseitu hosi ita-nia Komandante em Xefe Maun Boot Kayrala Xanana Gusmão sai mós matadalan ba ita-nia frente libertasaun sira durante tempu okupasaun Indonézia,” nia dehan.

Kay Rala Xanana Gusmao akompañadu hosi Ramos Horta, hatudu Livru rezisténsia) ne’ebé hakerek hosi Xanana Gusmao ho Titulu TEMATICA DE GUERRA SAUDACAO A II BRIGADA VERMELHA NOQUESTOES TATICAS OU OPERACIONAIS APRENDER A GUERRA iha Xanana nia rezidénsia iha Lecidre, Dili, Imajen Tatoli/António Goncalves.

Nia haktuir, dokumentu hirak ne’e entrega tutan hosi saudozu Germano Lekihare ho nia nia espoza Agata Correia Ximenes (Wewelari) ba nia primu no bin nu’udar mós aman no inan hakiak António Aparicio Guterres ho Paulina Correia Belo iha meiadu tinan 1986.

Nia dehan, la’ós ona segredu ba timor-oan hotu katak iha momentu ne’ebá la fásil ba sidadaun ka eis komanante FALINTIL ida atu asegura dokumentu hirak ne’e tanba prosesu refere nakonu ho risku no ameasa oin-oin ne’ebé bele prezudika sira ho família tomak nia vida.

Maibe ho aten brani tomak sira la hakfodak no taridu atu husik leet de’it dokumentu hirak ne’e atu monu ba inimigu nia liman iha momentu defísil nia laran.

“Ami agradese ba Aman Maromak, ba ita nia matebian no rai lulik sira hotu ne’ebé akompaña no salva nafatin autór no nia família tomak hodi konsege duni asegura no prezerva dokumentu hirak ne’e ho di’ak to’o ohin loron 16 dezembru 2020 hodi entrega ba eskritór no konseptór hosi dokumentu hirak ne’e mak Komandante Em Xefe FALINTIL Maun Boot Kayrala Xanana Gusmão liuhosi serimónia ida-ne’e,” nia hateten.

Kay Rala Xanana Gusmão simu dokumentu livru rezisténsia ne’ebé hakerek hosi Xanana Gusmão ho Titulu TEMATICA DE GUERRA SAUDACAO A II BRIGADA VERMELHA NOQUESTOES TATICAS OU OPERACIONAIS APRENDER A GUERRA, ne’ebé durante ne’e família Saudozu Lekihare no Antonio Aparicio Guterres prezerva hela. Serimónia entrega dokumentu ne’e realiza iha Xanana Gusmão nia rezidénsia iha Lecidre, 16 dezembru 2020. Imajen Tatoli/Antonio Goncalves.

Reprezentante família sente onradu no kontente tanba dokumentu estratéjiku no importante hirak ne’e hanesan esforsu tomak ba família no sai rekursu ba família hodi bele reafirma saudozu Germano Lekihare nia pozisaun ba prinsípiu libertasaun pátria nomoos kontribuisaun hosi sira-nia aman no inan hakiak António Maria Aparício Guterres no Paulina Correia Belo iha prosesu luta ba ukun rasik aan ida-ne’e.

“Maske iha serimónia ne’e reprezenta de’it hosi família no oan kiak sira, maibe ami fiar katak ami-nia aman sira hamutuk ona ho martir no herois da patria sira hotu akompaña hela hodi asiste hamutuk serimonia istórika ida-ne’e,” nia dehan. 

Iha biban ida-ne’e, família agradese ba Aires Eligio Aparicio Guterres,  Júlio Tomás Pinto, Tomás Cabral ne’ebé enkoraja no fó sira-nia apoia hodi fasilita ona komunikasaun entre família ho Kayrala Xanana Gusmão, inklui durante prosesu preparasaun tomak to realiza serimónia importante ida-ne’e.

“Ami-nia agradese tomak ba Maun Boot Kayrala Xanana Gusmão ne’ebé ho nia laran luak tomak simu ami família nia preokupasaun tomak hodi bele realiza serimónia istórika ida-ne’e no ami hein katak Estadu RDTL mós sei rekoñese no hatur fila-fali istória luta no kontribuisaun hosi ami-nia aman sira-ne’ebé loos no loloos iha istória libertasaun pátria,” nia hateten. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here