Imajen?Media PR.

BAUCAU, 16 dezembru 2020 (TATOLI)—Prezidente Repúblika (PR), Francisco Guterres Lú Olo, akompañadu hosi membru VIII Governu na’in-18 hala’o vizita ba Munisípiu Baucau, atu haree no ko’alia direta ho povu atu buka hatene povu nia problema, nune’e bele buka solusaun hamutuk.

“Ita-nia oan sira presiza edukasaun, saúde, infraestrutura no ekonomia, maibé  saida mak Baucau bele prodús atu hetan no sustenta. Ida-ne’e ita tenke tuur no ko’alia hamutuk atu fó solusaun hamutuk,” PR Lú Olo hateten lia hirak ne’e bainhira hala’o vizita ba iha Eskola Sekundáriu Jerál Númeru 01 Trilolo Baucau, kuarta ne’e.

Xefe Estadu hateten, Estadu ho Governu presiza tau forsa hamutuk hodi haree ekonomia ida-ne’ebé sustentável, nune’e labarik sira aban-bainrua hamriik metin hodi la’o ba oin.

“Se ita halo ekonomia ida depedente de’it ba osan mina-rai ho matan ida de’it, ne’e susar tebes. Osan bele hotu iha tempu ida. Hanesan Prezidente Repúblika hamutuk ho Parlamentu Nasionál ho Governu tenke kaer metin sustentablidade nasaun ida-ne’e nian ba oin,” PR Lú Olo hateten.

Veteranu ne’e mós sujere katak, povu tenke indepedente ho produsaun rasik, Timor-Leste tenke prodús rasik ai-han atu bele hakat ba oin, se la’e mak fós, batar, modo, fehuk roupa importa hosi rai-liur hotu.

“Bainhira sasan hirak ne’e haruka hosi rai-liur mai, ita hasai osan hodi hola. Entaun, ita-nia osan halai ba rai-liur no sei la hela iha ita-nia rain,” Xefe Estadu hateten.

Nia mós kontente ho Governu atuál ne’ebé iha hanoin hodi hamosu programa Cesta Bázika ne’ebé  la’ós de’it fahe hahan, maibé sinál hatudu ona katak Governu iha komitiva polítika ida boot tebes atu bele halo buat boot iha tempu oin.

“Prezidente Repúblika la’ós ezekutivu maibé akompaña hela saida mak Governu hanoin atu halo,” nia subliña.

Entretantu, membru Governu ne’ebé akompaña Prezidente Repúblika mak hanesan Vise Primeiru Ministru no Ministru Planu no Ordenamentu, Ministru Koordenadór Assuntu Ekonómiku, Ministru Justisa, Ministru Petróleu no Minerais, Ministru Administrasaun Estatál, Ministra Saúde, Ministru Edukasaun, Juventude no Desportu, Ministru Obras Públika, Ministru ba Assuntu Parlamentares no Komunikasaun Sosiál.

Ministru Turizmu, Komérsiu no Indústria, Ministru Agrikultura no Peskas, Ministru Asuntu Kombatentes Libertasaun Nasionál, Sekretáriu Estadu Ambiente, Sekretáriu Estadu ba Formasaun Empregu, Sekretáriu Estadu ba Terras no Propriedade, Sekretáriu Estadu Kooperativa, Sekretáriu Estadu Juventude no Desportu no Sekretáriu Estadu Arte no Kultura.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here