Komisáriu CAC, Sergio Hornai, lidera sosializasaun lei MPCC iha Munisípiu Aileu. Imajen/CAC

DILI, 16 dezembru 2020 (TATOLI)-Komisaun Anti-Korrupsaun (CAC), ohin, kontinua halo sosializasaun  lei númeru 7/2020 26 agostu, Medida Preventiva no Kombate Korrupsaun (MPCC) iha Munisípiu Aileu.

Notísia Relevante : CAC halo sensibilizasaun lei MPCC hahú hosi SEFOPE

Autoridade Munisípiu Aileu partisipa iha sosializasaun Lei MPCC ne’ebé organiza hosi CAC. Imajen/CAC

Atividade sosializasaun ne’e lidera direita hosi Komisáriu CAC, Sergio Hornai, akompaña hosi diretór Jerál Prevensaun no Sensibilizasaun, Rosário Araújo, diretora Promosaun Valores no Integridade, Leonilda Lobato ho Espesialista Anti-Korrupsaun (EAK).

Sensibilizasaun lei MPCC ne’e ho tema sentrál “HASAE KONESIMENTU AJENTE PUBLIKU KONABA LEI MEDIDAS REVENSAUN NO KOMBATE KORRUPSAUN” ne’ebé fokus liubá iha funsionáriu públiku no kargu xefia sira.

Nota imprensa ne’ebé Agência Tatoli asesu hodi CAC relata katak diseminasaun Lei MPCC ne’ebé hala’o iha salaun Munisípiu Aileu partisipa hosi Prezidente Autoridade Munisípiu Aileu, João do Rego, Komandante Operasaun Polísia Nasionál Timor-Leste (PNTL) Munisipiu Aileu, Inspektór  Xefe, Helio de Deus no funsionáriu públiku kargu  xefia liña ministerial sira, emprezáriu no lider komunitáriu sira.

Iha diskursu, Komisáriu Sergio Hornai, subliña kona-ba iha kapítulu II Regime de Declaracão de Rendimentos, Bens e Intereses lei MPCC  hahú hosi artigu 27 to’o ba iha artigu 58.

Sergio Hornai, foka ba  artigu hirak ne’e tanba artigu hirak ne’e mak sei obriga servidór povu sira oinsá hato’o deklarasaun sira-nia rikusoin mai iha CAC bainhira lei MPCC ne’e implementa iha fevereiru 2021.

Iha sosializasaun durante loron tomak ne’e partisipante sira ativamente rona no akompaña esplikasaun detallu  hosi Komisáriu Sergio Hornai nian ne’ebé fahe ba sesaun tolu (3);  dahuluk, esplikasaun Komisáriu Sergio nian kona-ba Lei MPCC,  daruak maneira prenxe formuláriu deklarasaun rikusoin aprezenta hosi diretora Promosaun Valores no Integridade, Leonilda Lobato, no  ikus pergunta ho hatán.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here