Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 15 dezembru 2020 (TATOLI)–Sekretáriu Estadu Kooperativa (SEKoop), Elizário Ferreira, hateten parte  United States Agency for International Development (USAID) disponível atu koopera ho Sekretaria Estadu ne’e iha área turizmu.

“USAID hakarak koopera atu haree ba dezenvolvimentu turizmu ho relasaun direta asuntu kooperativa liu-liu knaar Sekretaria Estadu Kooperativa (SEKoop) atu kontrola nia sustentabilidade,” Sekretáriu Estadu Elizário informa hafoin realiza sorumutuk ho reprezentante ajénsia amerikanu ne’e iha edifísiu Akait, tersa ne’e.

Notísia Relevante: MTKI-USAID sei realiza kampaña promosaun turizmu doméstiku

Maski nune’e, governante ne’e dehan, SEKoop presiza haree ba sustentabilidade bainhira termina kooperasaun no konklui programa.

“Ami labele simu kooperasaun ne’ebé to’o de’it iha dalan klaran, hafoin hotu lakon mós ninia ain fatin,” nia akresenta.

Tuir Sekretáriu Estadu ne’e, kooperativa hanesan tama iha tahu laran, tanba ne’e bainhira sai hosi tahu sei husik hela tahu ne’e iha fatuk leten atu ema hatene iha buat ruma iha ne’ebá, lae la fó rezultadu di’ak.

“Ida-ne’e sei konsentra liu ba área turizmu inklui dezenvolve teknolójiku no informasaun iha área kooperativa,” nia esplika.

Elizário esplika rekoñese tuir loloos kooperasaun ne’e tenke liuhosi nível embaixadór sira, maibé tanba servisu ne’e rasik iha relasaun direta ba asuntu kooperativa maka USAID hakarak koopera ho SEKoop atu haree kona-ba sustentabilidade.

Antes ne’e, iha setembru 2020, Ministériu Turizmu, Komérsiu no Indústria (MTKI) halo kooperasaun ho USAID liuhosi Tourism For All Project, ne’ebé empreza turizmu hala’o kampaña promosaun turizmu doméstik hahú iha loron 27 setembru to’o 31 dezembru 2020.

Kampaña ne’e ho objetivu atu inspira no suporta empreza turizmu sai turista iha rai laran rasik (turizmu doméstika).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here