Prezidente Tribunál Rekursu, Deolindo dos Santos.Imajen Tatoli/Antonio Goncalves

DILI, 15 dezembru 2020 (TATOLI)-Alokasaun Orsamentu Jerál Estadu (OJE) tinan fiskál 2020 nian ho montante $6,014,244.00   ba Tribunál Rekursu (TR) ezekuta ona to’o porsentu 68,8 (%).

Total orsamentu Tribunál Rekursu nian iha 2020 ho montante $6,014,244.00   ho kategoria kompromisu $104,542.95, obrigasaun $127,115.56, atuál/real  $4,010,843.25, saldu $1,771,742.24.

“Ezekusaun ba Tribunál Rekursu la’o di’ak,” Prezidente TR, Deolindo dos Santos, hateten ba jornalista, ohin, hafoin enkontru ho Prezidente Repúblika, Francisco Guterres “Lú-Olo” iha Palásiu Prezidensiál, Dili.

Nia hatutan, ezekusaun orsamentu 2020 korresponde ba atividade servisu rutina tribunál nian no selu dividida sira de’it.

TR nia, ezekusaun Orsamentu Dotasaun Temporáriu (DOT) ne’ebé antes ne’e iha rejime duodesimu Ministériu Finansas atribui dezde inísiu janeiru to’o outubru nia ezekusaun mensalmente lao di’ak.

Tuir dokumentu orsamentál ne’ebé prevee iha livru  Planu Asaun Anuál (Livru 2) nian hosi parte Tribunál Rekursu fó prioridade bem-estar sosiál  protesaun sosiál no sidadania, (edukasaun no formasaun), sidadania (Partisipasaun asesu ba justisa).

Nune’e mós  konsolida no  fortalese justisa,  demokrasia  no direitu umanu, promosaun sosiedade ho pasifika no  inkluziva (ODS 16), promosaun Estadu  direitu, igualdade  asesu, rapidés  no efisiénsia, prosimidade servisu no koezisténsia mekanizmu formal no informal (tradisionál) justisa ho fatór krusiál ho konfiansa.

Ba medida prinsipál setoriál  ba 2020 nian mak hanesan reforsa kapasidade ba ezersísiu kompeténsia konstitusionál, konsolida servisu ba  apoiu servisu hosi Tribunais sira, kria kondisaun servisu ba juiz no  ofisiais justisa, forma no  dezenvolve rekursu umanu.

Konsolida  Konsellu  koordenasaun (CC)  hanesan órgaun  orientasaun estratéjika  ba setór justisa no supervizaun hosi implementasaun ba planu estratéjiku dezenvolvimentu.

Iha medida prinsipál ne’e sei asegura  orientasaun  jerál ba servisu no atividade akordu ho nia programa sira ba tribunais, dezenvolve supervizaun no monitorizasaun sistemátiku.

Ikus liu mak, mantén relasaun permanente ho órgaun informasaun komunikasaun sosiál, promove boa governasaun no jestaun institusionál hosi tribunál sira, fortalese kapasidade rekursu umanu.

Jornalista   : Nelson  de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here