Imajen/Media STAE.

DILI, 15 dezembru 2020 (TATOLI)—Sekretariadu Tékniku Adminitrasaun Estatál (STAE) no Komisaun Nasionál Eleisaun (CNE-sigla portugés), ohin, halo lansamentu ba públika kona-ba rezultadu resensiamentu no aktu eleitorál no mós atualizasaun dadus ne’ebé mak hala’o durante tinan ida-ne’e (2020).

Diretór Jerál, Sekretariadu Tékniku Adminitrasaun Estatál, Acilino Manuel Branco, hateten hanesan tékniku hamutuk ho CNE,  hafoin konklui dadus aktu eleitorál iha loron 9 dezembru liubá, halo ninia prosesu sinkronizasaun hafoin hetan rezultadu horisehik lori ba plenária CNE atu halo apresiasaun antes públika  sai ninia rezultadu ba partidu polítiku sira no mós entidade sira seluk.

“Hanesan rezultadu ofisiál ba númeru eleitorál ne’ebé mak resensiadu no mós atualizadu iha ita-nia baze dadus sentrál STAE. Ita-nia eleitorál resensiadu no atualizadu to’o data ne’ebé ita suspende ne’e hamutuk 829.236 kompostu ho seksu mane hamutuk ema na’in-430,539 no seksu feto hamutuk ema na’in-398,687. Dadus sira ne’ebé agora ita aprezenta ne’e kona-ba dadus sira-ne’ebé ita prodús iha tinan ida-ne’e nian, no mós aumenta dadus sira antes ne’e,” Acilino Manuel Branco ba jornalista sira iha Salaun CNE, Caicoli, Dili, tersa ne’e.

Nia haktuir, objetivu prinsipál halo lansamentu ba iha públiku tanba bazea ba Leí númeru 6/2016 kona-ba baze dadus resensiamentu eleitorál katak aktu resensiamentu ne’e nu’udar aktu kontinuasaun.

“Tanba ne’e mak iha janeiru mai to’o dezembru nia-laran ne’e, ita halo atendimentu ba ita-nia sidadaun sira no rejistu ita-nia sidadaun sira-ne’ebé mak atinje ona tinan 16 ba leten. No mós atualiza ita-nia eleitorál sira-ne’ebé mak rejistradu ona hakarak atualiza sira-nia dadus,” nia dehan. 

Imajen/Media CNE.

Durante iha periodu ida-ne’e, nia dehan, STAE haree katak taxa partisipasaun ne’e aas hosi prosesu sidadaun sira rejistu eleitorál, entaun haree ba Lei baze resensiamentu katak hafoin prosesu ida-nia rezultadu tenke fó sai ba públiku liuliu ba partidu polítiku sira, mídia Estadu nian no mós ba iha Jornál Repúblika.

Nia esklarese, agora ba tinan oin nu’udar tinan preparativu ba eleisaun ninian entaun atendimentu sei la’o makaas liután iha nivél Postu Administrativu hotu no mós posibildade ba rai-li’ur, tanba Lei resensiamentu ne’e fó mós direitu ba sidadaun hotu tantu iha rai-laran no mós iha rai-liur.

“Maibé depende mós ba situasaun COVID-19 ne’ebé mak iha entaun se ba 2021 mak ita-nia Kondisaun sirkulasaun populsaun nian livre fali ba iha nasaun sira seluk, posibilidade halo atendimentu ba nasaun sira-ne’ebé mak uluk ita halo ona resensiamentu no mós eleisaun jerál iha tinan kotuk tanba númeru ida-ne’e provizóriu ba tinan ida-ne’e nian,” nia subliña.

Maibé, nia hateten, atu hasoru eleisaun Prezidente Repúblika ninian ne’e sei halo resensiamentu no atualizasaun tama ba 2021, no mós halo tuir hanesan Lei hakerek katak loron 30 antes ba eleisaun fó sai dadus fiksu, no eleitores sira mak ezerse sira-nia direitu loron votasaun tantu ba Prezidente Repúblika no ba Prezidente Parlamentu ninian.

Iha fatin, hanesan Presidente CNE, Alcino de Araújo Barris, hatutan orgaun adminitrasaun lansa resensiamentu baze dadus ne’e, CNE konsidera importante tebes tanba baze dadus ne’e bainhira País Demokrátiku ko’alia kona-ba ba eleisaun tenke iha referénsia baze dadus.

“Tanba ita ko’alia kona-ba baze dadus ne’e aktu ida-ne’ebé importante hetan ninia tratamentu dignifikadu tebes, tanba buat hotu tenke liuhosi transparénsia ba ema hotu haree,” Prezidente CNE dehan.

Nia tenik, hosi baze dadus ida-ne’e mak utiliza iha kualker eleisaun maibé mós uza ba nia utilidade tolu mak hanesan inskrisaun ba partidu polítiku sira, kandidatu ba prezidensiál no eleisaun, tanba ne’e mak aktu tolu ne’e importante tebes atu ema hotu presiza hatene nune’e evita deskonfiansa.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here