Segundu Komandante Polísia munisípiu Dili, Superintendente Euclides Belo. Imajen TATOLI/ António Gonçalves

DILI, 15 dezembru 2020 (TATOLI)- Liuhosi operasaun konjunta Polísia Eskuadra Don Aleixo Comoro, Dili, segunda lokraik (14/12), detein tan joven na’in-rua ne’ebé fa’an fogete ilegál iha área Tasi Tolu, Dili.

Suspeitu na’in-rua ne’ebé PNTL detein ho asaun flagante delito ho inisiál PMF no MJG. Polísia detein sira iha sira-nia hela fatin iha Aldeia 12 Outubru, Suku Comoro, Postu Administrativu Don Aleixo-Dili.

“Servisu sekreta PNTL Dili kaptura sidadaun na’in-rua iha área Tasi Tolu ne’ebé sira halo tranzasaun fa’an fogete ilegál no la iha dokumentu komprovativu hosi entidade relevante,” Segundu Komandante PNTL Dili, Superintendente Euclides Belo, hateten  ba jornalista, ohin, iha Komandu  PNTL,  Caicoli, Dili.

Suspeitu na’in-rua PNTL detein ho objetu apreensaun hanesan fogete delapan-sut hamutuk lolon 40, fogete modelu hercules hamutuk lolon sia (9), fogete hercules kaixa ki’ik hamutuk 42 no evidénsia seluk tan.

Durante investigasaun, suspeitu sira rekoñese sira sosa fogete ilegál ne’e hosi ema balun ne’ebé fa’an subar ba sira.

Suspeitu na’in-rua daudaun ne’e submete ona ba prosesu investigasaun oras 72 remata sei aprezenta ba Ministériu Públiku hodi promove ba primeiru interrogatóriu iha Tribunál Dili.

Daudaun ne’e PNTL Dili detein ona suspeitu hamutuk ema na’in-ualu (8) ne’ebé fa’an fogete ilegál iha kapitál Dili liu rede sosiál Facebook.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here