Ofisiais Polísia Militár hasai fotografia hamutuk ho inspektores sira. Imajen Tatoli/Antonio Goncalves

DILI, 15 dezembru 2020 (TATOLI)-Komandu Polísia Munisípiu Dili prepara ona karta hodi aprezenta ba Komandu FALINTIL-Forsa Defeza Timor-Leste (F-FDTL) Unidade Polísia Militár (PM) hodi koopera implementa operasaun alargada minimiza problema hasoru loron boot natál, 25 dezembru 2020 no tinan foun, 01 janeiru 2021.

Segundu Komandante Polísia Munisípiu Dili, Superintendente Euclides Belo. Imajen Tatoli/Antonio Goncalves

Segundu Komandante PNTL Munisípiu Dili, Superintendente Euclides Belo dehan, sira halo ona koordenasaun ho Komandante Polísia Militár, Majór Abel da Costa Xavier “Niki”

“Hahú aban ba oin, ami sei halo koordenasaun ho Komandante Polísia Militár, Majór Abel da Costa Xavier “Niki” hodi halo operasaun alargada antes tama natál no tinan foun entre Instituisaun Seguransa no Defeza atu hala’o servisu seguransa ba ita nia komunidade sira bele livre prepara simu loron boot natál, 25 dezembru 2020 no tinan foun, 01 janeiru 2021, hodi ita nia komunidade sira bele goja liberdade ukun aan ho hakmatek,”   Euclides  Belo hateten ba jornalista iha Komandu PNTL, Caicoli, Dili.

PNTL no PM sei la tolera kualkér Grupu Organizasaun Arte Marsiál (GAM) no Grupu Juventude sira atu halo problema iha estrada no hemu tua arbiru iha fatin públiku, tanba Timor-Leste sei situasaun Estadu Emerjénsia.

Koopera ho KPK

Iha parte seluk, ohin, Komandu PNTL Munisípiu Dili, Superintendente Xefe, Henrique da Costa, ho ekipa komandante eskuadra sira hala’o mós enkontru koordenasaun servisu ho membru KPK Suku 30-liu hosi Munisípiu Dili nian atu halo planu prevene problema kazu krime no violénsia hasoru loron boot natál no tinan foun.

“Enkontru atu fokus liu ba prevensaun konflitu no segundu haree sasán kontra bandu lei númeru 5/2017 hodi garante preparasaun ba natál no tinan foun,” Euclides informa.

Nia dehan, knaar KPK ne’e importante hodi koopera ho polísia oinsá garante seguransa iha bairru hotu-hotu atu la’o seguru.

Komandu Dili husu ba KPK atu koordena ho seguransa Igreja nian hanesan THS-THM no Grupu Eskutizmu Katólika hodi fó seguransa durante misa natál no tinan foun hala’o sarani sira labele tiru arbiru fogete iha arbiru iha arredores Igreja nian.

Jornalista   : Eugénio Pereira

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here