Motór 10 ne'ebé polísia halo apreensaun hosi suspeitu sira. Imajen Tatoli/Eugénio Pereira

DILI, 15 dezembru 2020 (TATOLI)- Komandu Polísia Munisípiu Dili, segunda lokraik (15/14), entrega ona motorizada 10  ne’ebé Polísia halo apreensaun hosi suspeitu sira ne’ebé “lori subar” durante ne’e.

Notísia Relevante : Polísia hetan ona motór 10 ne’ebé ema “lori subar”

Motór 10 ne’ebé polísia halo apreensaun hosi suspeitu sira. Imajen Tatoli/Eugénio Pereira

Segundu Komandante PNTL Munisípiu Dili, Superintendente Euclides Belo, dehan motór hirak ne’e seidauk bele entrega ba na’in sira, tanba ne’e kazu ne’e sei aprezenta ba Ministériu Públiku hodi promove kazu ne’e ba Tribunál nu’udar evidénsia hodi koordena suspeitu na’in tolu ne’ebé PNTL detein ona.

“Motór sira ne’ebé sai evidénsia ba krime na’ok ne’e ohin ita transporta ona ba edifísiu Ministériu Públiku hodi aguarda hamutuk iha ne’ebé to’o kazu ne’e hetan desizaun hosi tribunál atu entrega fila ba na’in,” Superintendente, Euclides Belo hateten, ohin, ba jornalista iha Komandu PNTL, Caicoli, Dili.

PNTL Dili mós simu keixa hosi na’in ba motór hirak ne’e halo aprezentasaun keixa ba PNTL hodi aprezenta sira-nia dokumentu motór nian no kronolojia motór ne’e lakon.

Nia husu atu vítima sira ne’ebé motór lakon kontinua koopera ho PNTL hodi hato’o pedidu ba PNTL hodi aprezenta prosesu rejistu kriminál nian ba Ministériu Públiku hodi prosesa autór sira tuir lei.

Tuir observasaun Agência Tatoli nota katak motór balun ne’ebé suspeitu sira “foti subar” balun sei kompleta ho xapa matrikula no balun suspeitu sira sobu ona.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here