Imajen/Espesiál.

DILI, 15 dezembru 2020 (TATOLI)—Reprezentante povu iha uma fukun Parlamentu Nasioná (PN) husu  ekipa tékniku hosi Eletrisidade Timor-Leste (EDTL) atu kontrola ahi iha selebrasaun Natál no Tinan Foun nune’e ahi labele mate.

“Ha’u husu Sekretáriu Estadu Komunikasaun Sosiál atu kanaliza hela ba Ministériu Obra Públika bele tau subsídiu ruma ba membru EDTL sira atu-bele kontrola ahi ho másimu tanba semana oin ita tama ona tempu liturjia, keta halo besik selebrasaun ahi mate fali,” membru parlamentu nasionál, deputadu José Paicheco Soares, hato’o preokupasaun ne’e liuhosi plenária, tersa ne’e.

Nia fó ezemplu, bainhira sentru estasaun Camea hasoru problema ruma entaun dirasaun ba munisípiu Aileu no Ermera ahi mate hotu.

Entretantu Sekretáriu Estadu Komunikasaun Sosiál, Mericio Juvinal Akara, rejista preokupasaun ne’e no sei enkamiña ba ministériu relevante.

“Governu halo intervenaun daudaun inklui garante eletrisidade nune’e laiha problema durante selebrasaun Natál no Tinan Foun,” governante ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here