Imajen/Media PR.

DILI, 15 dezembru 2020 (TATOLI)—Reprezentante Povu iha uma fukun Parlamentu Nasionál (PN) tersa ne’e aprova votu kongratulasaun hodi hato’o felisitasaun ba Dioseze Dili ne’ebé halo ona tinan 80. 

“Ho nune’e votu kongratulasaun númeru 19/2020 aprovadu,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, anunsia liuhosi plenária, Parlamentu Nasionál.

Xefe bankada Partidu Demokrátiku (PD), António da Conceiçao “Kalohan”, esplika la’ós de’it selerasaun maibé kontribuisaun ne’ebé Igereja Katólika ne’ebé halo ba povu Timor-Leste relasaun ho prosesu luta ba ukun rasik-aan.

“Igereja nu’udar personazen prinsipál dezde malae mutin nia tempu to’o rezisténsia, prokalamasaun independénsia no to’o ohin loron,” fundamenta deputadu Kalohan ne’ebé sai proponente ba projetu votu kongratulasaun ne’e.

Loron  ksolok ba  sarani sira iha Arkidioseze Metropolitana Dili, ne’ebé hahú eziste iha loron 4 setembru tinan 1940 hosi Amu Papa Pio XII no tinan 2020 halo ona tinan 80 maibé selebra iha loron 8 fulan-dezembru 2020 liubá ho tema selebrasaun “Per Mariam Ad Iesum”.

Antes ne’e, Arsebispu Don Virgilio do Carmo da Silva, fó mensajen ba sarani  Arkidioseze Dili tomak katak la to’o de’it atu halo memoria ida no festa ho tarutu makaas, maibé momentu atu kontempla no selebra Maromak nia domin mai ita.

“Haree ba tinan 80 fó hanoin fali idade avó ida-nian, ne’ebe’ iha oan no bei-oan sira barak. Tinan 80 mak pasu ida la’o ba oin no lori unidade iha kreda nia oan sira-nia moris. Selebra ita nia-vida nu’udar kreda Kristu nian,” Arsebispu Don Virgilio do Carmo da Silva hato’o mensajen.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here