Formandu PFMO.Imajen/Felicidade Ximenes.

DILI,15 dezembru 2020 (TATOLI)—Parceria para Melhoria da Gestão e Supervisão das Finanças Públicas (PFMO) “Osan Povu Nian, Jere ho Diak” ensera formasaun kona-ba notisia falsa (fake news) no dezinfomasaun inklui jornalizmu dadus ba jornalista imoroan na’in 37 maihosi meiu komunikasaun sosiál oioin.

PFMO ensera formasaun ne’e iha Timor Plaza, hafoin oferese formasaun hahú ona iha loron 30 fulan-novembru no ramata iha loron 15 dezembru,  iha sala formasaun 2 PMFO nian iha Pateo, Dili, Timor-Leste.

Notísia Relevante :PFMO realiza formasaun ateliê jornalizmu dadus

Koordenadór Jerál PFMO, Rui Denis, konsidera formasaun ba notísia falsa no dezinfomasaun inklui jornalizmu dadus importante ba jornalista Timoroan sira  atu rigór liután iha kobertura lor-loron nian, liliu ajuda jornalista sira atu luta kombate notísia falsa.

”Formasaun ne’e foka liu ba redusaun notísia falsa sira ne’ebé mak iha, no jornalista sira iha kompeténsia atu kombate informasaun sira ne’ebé la iha valór,” Kordenadór Jerál  PFMO  Rui Denis hateten liu hosi diskursu enseramentu kursu, iha Timor Plaza, Tersa (15/12).

Nune’e mós reprezentante Embaixadór Portugál iha Timor-Leste, João Brito Câmara,  hateten projetu ne’e ho nia objetivu atu kontribui ba governasaun di’ak no ajuda dezenvolvimentu iha Timor-Leste.

”Ohin  ami partisipa serimonia ne’e atu entrega sertifikadu ba kursu notísia falsa no jornalizmu dadus, tanba projetu ne’e husi PFMO  ne’ebé finansia husi Uniaun Europeia no Institutu Camoes.IP  hodi kontribui ba boa-Governasaun no dezenvolvimentu Timor nian,” João Brito Câmara hateten.

Jornalizmu dadus sei reforsa ekonomia no finanseira  liuhosi kapasidade profisionál jornalista sira no mós órgaun komunikasaun sosiál nian, atu promove kultura profisionál, etika ho responsabilidade.

Formasaun ne’e ho totál oras 30 ne’ebé hetan apoiu hosi Centro Protocolar de Formação Profissionál para Jornalistas (CENJOR), Portugál.

Inisiativa ne’e realiza iha sistema videkonferénsia, liuhosi palataforma zoom, ho formasaun diária durante oras rua kada loron, hahú husi segunda to’o sesta, no oras 10 formasaun ba traballu autónoma, ho tutoriál formadór sira nian.

Matéria ne’ebé formadór sira esplora durante formasaun mak hanesan hanesan, kompriende fundamentu jornalizmu iha era dijitál, identifika notísia falsa ida, identifika no koñese tipu dezinformasaun ezistente iha ambiente dijitál, identifika no rekoñese tipu regulasaun informasaun iha era dijitál, hatene uza ferramentas atu identifika no dezmistifika notísia falsa, aplika koñesimentu sira kona-ba kazu konkretu iha Timor-Leste liuhosi verifikasaun informasaun iha materia orsamentu, ekonomia, finansas públika, no atualidade ho relevánsia kona-ba prestasaun serbisu públiku Timoroan nian.

Ana Pinto Martinho ho Rui Guerreiro hosi CENJOR Portugál mak sai hanesan formadór ba formasaun ne’e, no sira na’in rua nu’udár jornalista ho esperiénsia tinan 20, espesializadu iha teknolojia informasaun no komunikasaun.

Ida ne’e mak atividade temátika iha ámbitu parseria entre CENJOR no PFMO-C2 ba fortalesimentu profisionál komunikasaun sosiál iha Timor-Leste, iha programa kolaborasaun ne’ebé inisia iha novembru 2019, ho nia kontinuasaun iha 2021 no 2022.

Entretantu, iha serimonia enserramentu ne’e entrega mós sertifikadu ba formandu hamutuk 30-resin.

Notísia Relevante :MNEK “Avalia” Progresu Implementasaun Projetu Finansa Públika no PFMO

Jornalista:Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here