Vise-Ministru Interiór, António Armindo. Imajen TATOLI/Egas Cristovão

DILI, 15 dezembru 2020 (TATOLI)—Ministéru Interiór (MI) identifika no haruka ona lista membru Polísia Nasionál Timor-Leste (PNTL) hamutuk na’in-20 ne’ebé deskondia fasilita grupu arte-marsiál hosi Persaudaraan Setia Hati Terate (PSHT) sa’e sabuk iha Timór Osidentál, Indonézia.

Tuir Vise-Ministru Interiór, António Armindo, lista hirak ne’e foin mak deskonfia no sei hein rezultadu investigasaun ramata mak bele hatene loloos.

“Loos duni katak iha duni membru PNTL sira fasilita sidadaun balun ba sa’e sabuk iha Indonézia, lista ne’e iha duni no entrega ona ba Komandu iha fulan-ida liubá. Agora ita hein de’it desizaun, Komandu halo ona demisaun ba na’in-ida no hein tan desizaun ba sira seluk, atu dehan katak buat ida deskonfia ne’e seidauk loos,” Vise Ministru António Armindo, relata hafoin enkontru ho Primeiru-Ministru no Ministru Interiór, Taur Matan Ruak iha Palásiu Governu, tersa ne’e.

Notísia Relevante: Pesoál PNTL haruka oan ba sa’e sabuk iha Indonézia

Governante ne’e subliña, lista ne’ebé manda ona ba Komandu PNTL hamutuk ema na’in-20, ne’ebé maioria hosi membru Unidade Patrullamentu Fronteira (UPF), balun Polísia bain-bain no balun iha servisu migrasaun.

“Dadaun ne’e sei iha prosesu investigasaun nia laran, kuandu ramata ona mak foin hatene sé mak sala no sé mak lae?,” nia akresenta.

Iha fulan agostu to’o setembru 2020, ema tama ilegál liu fronteira terrestre hamutuk na’in-390 no hosi númeru ne’e, na’in-222 hanesan membru PSHT ne’ebé autoridade kompetente sira halo ona investigasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here