Forsa Komponente Naval na’in tolu hala’o formatura iha seremónia aniversáriu Komponente Naval bá dala 17 iha Baze Naval Hera. Imajen/Mídia GPR

DILI, 15 dezembru 2020 (TATOLI)- Komandu FALINTIL-Forsa Defeza Timor-Leste (F-FDTL) Komponente Navál Lijeira (KNL) servisu hamutuk ho Asosiasaun Família Militár (AFAMA) halo atividade doasaun raan ba Banco de sangue hodi apoiu pasiente sira ne’ebé hala’o tratamentu saúde iha Hospital Nasionál Guido Valadares (HNGV).

Prezidente AFAMA, Cidalia Mesquita Ximenes. Imajen/F-FDTL

Prezidente AFAMA, Cidalia Mesquita Ximenes dehan, atividade doasaun raan ne’e nu’udar parte ida hosi jornada selebrasaun aniversáriu Komponente Navál Lijeira ba dala-XIX iha janeiru 2021.

“Ita halo doasaun raan ida ne’e hanesan nesesidade ida atu tulun pasiente sira ne’ebé moras no presiza ita nia kontribuisaun,” prezidente AFAMA,  Cidalia Mesquita Ximenes, hateten liuhosi karta komunikadu ne’ebé Agência Tatoli  asesu, ohin.

Iha fatin hanesan, Xefe Banco de Sangue HNGV, Januário da Cruz Freitas, hato’o agradese ba AFAMA no membru Forsa Komponente Navál sira ne’ebé fó raan ba Banco de Sangue.

“Raan ne’ebé ami rekolla hosi membru F-FDTL sira iha komponente Naval Lijeira ne’e ami sei presiza hotu, maibé sei tau iha laboratóriu Banco de Sangue hodi halo selesaun,” Januário esplika.

Nia hatutan, raan sira ne’ebé hasai parte ekipa médiku sei halo identifikasaun ba raan tipu A, B no O maka identifika balun iha moras sei haruka fali rezultadu ba Komandu F-FDTL atu haruka membru sira tenke tuir tratamentu saúde no raan sira ne’ebé mak livre hosi moras sei oferese ba pasiente sira.

AFAMA fasilita formasaun ba espoza militár

Iha parte seluk, AFAMA fasilita formasaun mós formasaun ba espoza F-FDTL hodi aumenta sira nia koñesimentu iha área militár nian.

Prezidente AFAMA, Cidalia Mesquita Ximenes, hateten formasaun ida ne’e realiza atu feto bele koñese kle’an kona-ba sira-nia la’en nia diviza no servisu iha instituisaun F-FDTL

“Ami hanesan espoza ba iha F-FDTL ami tenke fasilita malu formasaun atu eleva ami nia kapasidade,”  Cidalia hateten.

Reprezenta Xefe Estadu Maiór Forsa Armada, Xefe Operasaun J3 Tenente Koronél Infantaria, Domingos Costa Santo. Imajen/F-FDTL

Reprezenta Xefe Estadu Maiór Forsa Armada, Xefe Operasaun J3 Tenente Koronél  Infantaria, Domingos Costa Santo dehan, formasaun ne’e di’ak hodi aumenta espoza militár sira bele hatene kona-ba servisu forsa armada nian.

Formasaun ne’e halo iha kategoria oin tolu, ida ko’alia entre ema ida ho ema ida bainhira hasoru malu, ida mak tuir duni formasaun no ida seluk mak formasaun nivel akadémiku ne’ebé aas.

Inisiativa AFAMA fó formasaun ba espoza militár sira ida ne’e di’ak, tanba dala uluk hahú ona iha komponente navál ba oin komponente sira seluk mak tenke realiza atu nune’e espoza sira hatene servisu vida militár oinsá atu respeita malu tuir diviza ne’ebé mak iha.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here