Ekipa INDMO, SEFOPE inklui entidade relevante, partisipa iha Asembleia Jerál virtuál Worldskills Asia, iha edifísiu INDMO, Fatuhada, tersa (15/12). Imajen TATOLI/ Natalino Costa

DILI, 15 dezembru 2020 (TATOLI)–Liuhosi Asembleia Jerál ba da-haat via virtuál, organizasaun naun lukrutivu ne’ebé halibur nasaun Ázia, Worldskills Asia, ratifika Timor-Leste sai membru.

Diretora Institutu Nasionál Dezenvolvimentu Mão de Obra (INDMO), Isabel Fernandes  de Lima, hateten  reuniaun ne’e realiza iha Abu Dhabi durante oras haat nia laran no hetan partisipasaun hosi nasaun membru via virtuál.

“Nasaun membru halo ratifikasaun ba Timor-Leste sai nasaun  membru iha organizasaun Worldskills Asia no halo aprezentasaun ba perfíl nasaun membru ida-idak kona-ba progresu  no dezenvolvimentu mão de obra iha ida-idak nia nasaun la’o oinsá no la’o to’o ona iha ne’ebé,” Diretora INDMO, Isabel Fernandes  de Lima, informa ba Agência TATOLI, tersa ne’e, hafoin ramata enkontru virtuál, iha edifísiu institutu, Fatuhada.

Iha nasaun hamutuk 14 hosi nasaun 26 iha rejiaun Ázia, maka hola parte iha enkontru virtuál ne’e.

“Nasaun 14  vota hodi simu Timor-Leste nian adezaun sai nasaun membru organizasaun ne’e,” nia akresenta.

Diretora ne’e haktuir, prosesu Timor-Leste sai membru inisia iha tinan 2019, ne’ebé hetan konvite hosi Worldskills Asia, hafoin INDMO hatudu interese atu sai membru.

“Sira simu hafoin ami konsulta ho Ministériu Koordenadór Asuntu Ekonómiku ein ezersísiu, Fidelis Magalhães, momentu ne’ebá, hafoin konsulta ho Sekretaria Estadu Formasaun Profisionál no Empregu (SEFOPE) , no hetan apoia tomak, daudaun atuál Ministru Koordenadór  Asuntu Ekonómiku, Joaquim Amaral no Sekretáriu Estadu Formasaun Profisonál no Empregu, Alarico do Rosário, apoiu tebes sesaun ida ne’e,” nia hatutan.

Dirijente ne’e esplika, papél Timor-Leste iha organizasaun ne’e maka atu sai hanesan plataforma atu transfere koñesimentu, abilidade,  no atitude entre joven sira ne’ebé maka iha rejiaun Ázia rasik liuhosi mão de obra.

“Ita la’ós ba partisipa de’it enkontru, maibé iha ne’ebá ita sei konsentra buat barak kona-ba indústria no empreza sira sei aprezenta formasaun profionál mão de obra atu ita hetan esperiénsia, nune’e ita bele fó formasaun profionál,” nia haktuir.

Timor-Leste bele kompete iha nível rejionál

Aleinde ne’e, vantajen seluk sai nasaun membru maka bele forma ema atu kompete la’ós e’it iha rai-laran maibé iha nível rejionál.

“Ita hakarak aprende hosi nasaun membru Worldskills Asia no ita mós agora daudaun iha diretu ona atu tuir kompretisaun aptidaun internasional nível Ázia ne’ebé sei realiza iha tinan 2021,” nia fó hanoin.

Iha asembleia virtuál ne’e, organizasaun ne’ebé promove kualidade abilidade tékniku no edukasaun vokasionál ne’e, hato’o mós mapa roteiru kona-ba eventu ne’ebé sei realiza iha tinan oin.

Timor-Leste sei partisipa iha Asembleia Worldskills Asia iha Koreia Súl ne’ebé sei realiza iha tinan 2022 no prepara atubele sai hosting iha Asembleia Jerál iha tinan 2023.

“Timor-Leste seidauk bele sai hosting. Ita preparaba tinan 2026 tanba presiza iha korelasaun ho membru Governu tutela hodi hetan apoiu,” nia hatutan.

Papél organizasaun internasionál ne’e maka atu haree no avalia prosesu dezenvolvimetu formasaun profionál mão de obra iha kada nasaun membru.

Iha fatin hanesan,  Diretór Estratejia Nasionál Empregu SEFOPE, Aniceito Leto, hateten Timor-Leste nia adezaun ba organizasaun ne’e iha vantajen ba futuru tanba permite joven sira asesu merkadu nasionál no internasionál ho di’ak liuhosi formasaun profisionál.

Tanba ne’e parte sekretaria Estadu ne’e  kontinua tau prioridade ba formasaun joven atubele promove mão de obra iha nível internasionál.

“INDMO ne’e parte ida hosi SEFOPE, tanba ne’e saida maka ohin institutu nasionál ne’e aprezenta iha enkontru virtuál ne’e hanesan vizaun Sekretaria Estadu. Tanba ne’e ita prepadadu partisipa iha Worldskills Asia,” nia akresenta.

Nune’e mós, partisipante Asembleia Jerál virtuál, Imenio Martins, nota katak partisipasaun Timor-Leste nian iha organizasaun ne’e importante tanba bele fó oportunidade ba joven sira kompete iha área abilidade.

“Ita presiza adapta ho mundu globalizaun agora, tanba importante iha koñesimentu abilidade atu kompete no kria empregu ba ita-nia an,” nia rekoñese.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here