Governante sira bainhira halo inspesaun iha loja iha kapitál Dili, segunda (14/12). Imajen TATOLI/Florêncio Miranda Ximenes

DILI, 14 novembru 2020 (TATOLI)Bazeia ba preokupasaun públiku, Governu liuhosi Ministériu Koordenadór Asuntu Ekonómiku (MKAE), Ministériu Turizmu, Komérsiu no Indústria (MTKI) hamutuk ho Autoridade Inspesaun no Fiskalizasaun Atividade Ekonómika Sanitátaria no Alimentar (AIFAESA) halo inspesaun hodi haree kualidade produtu Cesta Bázika iha loja tolu iha kapitál Dili ne’ebé implementa voucher.

Loja tolu ne’e maka hanesan W.Four, Leader no Dili Mart.

Ministru Koodernadór Asuntu Ekonómiku, Joaquim Amaral, informa objetivu atividade ne’e maka atu haree direta prosesu troka voucher no garante ai-han nia ijine no kualidade inklui kuatidade tuir dekretu-lei hodi distribui ba benefisiáriu.

“Ami hahú halo inspesaun ba loja tolu atu husu hadi’a sasán sira ne’ebé loron hirak liubá públiku preokupa, ne’ebé komesa hadi’a ne’e sinál di’ak, karik sei iha fallansu ruma ami sei ko’alia ho AIFAESA atubele haree,” Ministru Joaquim tenik bainhira halo inspesaun iha loja Leader, Comoro, segunda ne’e.

Notísia Relevante: Sasán Cesta Bázika “fuhuk”, CAC kontinua investiga jerente Dili Mart

Nune’e, governante ne’e kontinua enkoraja kompañia fornesedór atu garante kualidade no kuatidade produtu sira hodi komunidade bele asesu ho di’ak.

“Ha’u haree iha sasán nia folin laiha mudansa no nafatin hanesan montante ne’ebé Governu aprova ona,” nia akresenta.

Aleinde ne’e, Governu mós kontinua husu ba AIFAESA atu kontinua kontrola kualidade no folin produtu Cesta Bázika.

Iha biban hanesan, Diretór Operasaun AIFAESA, Gabiel da Costa, hateten parte autoridade sei kontinua halo inspesaun.

“Ami sei kontinua tau matan hodi garante kualidade produtu sira ne’ebé ijine no saudável ba benefisiáriu sira tuir objetivu programa,” nia promete.

Komunidade aldeia 03, suku Fatuhada, Romeo Xavier Tilman, lamenta ho folin sasán tanba balun iha merkadu ho folin sentavu 0,50, maibé kompañia fa’an ho $1.

“Aproveita Governu mai, ami bele hato’o ba sira nune’e bele fó atensaun ba loja no maluk sira ne’ebé seidauk simu karik sira mai loja labele hasa’e tan folin,” nia sujere.

Inspesaun ne’e akompaña mós hosi Vise-Ministru Turizmu, Komérsiu no Indústria,  Domingos Lopes Antunes.

Programa Cesta Bázika implementa hosi Gabinete MKAE, MTKI, Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Governu implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu programa Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here