Vise-Ministru Interiór, António Armindo. Imajen TATOLI/Egas Cristovão

DILI, 15 dezembru 2020 (TATOLI)—Vise-Ministru Interiór, António Armindo, hateten dívida Polísia Nasionál Timor-Leste (PNTL), ne’ebé antes ne’e ho montante millaun $2, selu ona balun.

“Dívida PNTL kuaze atu selu hotu ona, hela de’it dívida iha Eletricidade de Timor-Leste (EDTL) no Telemor ho totál $900.000,” Vise Ministru António Armindo relata hafoin enkontru ho Primeiru-Ministru (PM) no Ministru Interiór, Taur Matan Ruak, iha Palásiu Governu, tersa ne’e.

Notísia relevante: MI hahú verifika dívida PNTL

Kona-ba Dívida PNTL iha operadór telekomunikasaun vietname daudaun ne’e haruka ona dokumentu sira ba Ministériu Públiku hodi halo investigasaun, relasiona ho kazu dada internet ilegál.

“Garante katak sei selu hotu kedas, maibé kona-ba Telemor depende ba desizaun Tribunál tanba halo ona karta ba Ministériu Públiku atu haree dívida,” nia akresenta.

Durante ne’e Telemor halo instalasaun ba rede internet no Closed-circuit television (CCTV) ne’ebé monta iha estrada kapitál Dili, ne’ebé PNTL sei iha dívida entre $200.000 to’o $500.000.

Iha parte seluk, governante ne’e informa kona-ba ezekusaun Orsamentu Jerál Estadu (OJE) 2020 ba Ministériu Interiór (MI) atinje ona 95% no PNTL 96%.

Iha orsamentu tinan ne’e, Ministériu Interiór  (MI) prevee $13.759.432, enkuantu ba PNTL $32.230.387, nune’e montante totál besik besik millaun $50.

Verba espesífiku ba MI aloka ba saláriu vensimentu $5.980.755, bens no servisu $5.878.678, transferénsia públika $1.900.000, enkuantu ba kapitál menór no kapitál dezenvolvimentu laiha.

Hosi orsamentu ne’e  ba fahe ba  diresaun Seguransa Patrimóniu  Estadu  $2.597.710, Servisu Migrasaun $808.016, Programa Prevensaun  Konflitu Komunitáriu  $120.097, Protesaun Sivíl no Servisu Bombeiru $700.150, Boa Governasaun Jestaun Institusionál  $845.682,  Jestaun Risku Dezastre $3.708.919, saláriu no vensimentu $5.671.858.

OJE 2020 ba PNTL hamutuk $32.230.387 aloka ba saláriu no vensimentu $16.640.508, bens servisu $15.349.879, kapitál menór $240.000, kapitál dezenvolvimentu no transferénsia publika laiha.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here